Mizo Students’ Union (MSU) chuan dik lo taka tribal certificate neia an puh, Kamrul Laskar chu a traibal certificate chu sawrkara surrender turin an hriattir a, mahse nimin thlenga Kamrul Laskar hian tribal certificate hi a surrender loh avangin MSU chuan Kamrul Laskar zawn chhuah hna hi thawh an tum thu thuchhuah siamin an tarlang a ni.
India sawrkar chuan tlang mi (tribal)-te hi hnam hnufual an nih avangin India khua leh tui dangten an chhawr ve theih loh tur hamṭhatna hrang hrang a siamsak a, kawng tam takah ngaihnatthiamna a pe bawk a, tribal ni lo tan tribal-te hamṭhatna leh ngaihnatthiamna dawn ang a dawn theih loh a, tribal hmeichhia-ten pasal atan tribal ni lo mipa pasala an neih pawhin an fate chu tribal-a chhiar theih an ni lo a ni.
Tuna MSU-in an buaipui mek pawh hi tribal ni lo, tribal certificate nei si a ni a, hei hi politics thil ni lovin, ram leh hnam thil a ni a, ngaih thutak a ngai hle a, he boruak lo thleng hian Mizo mipuite hemi kawngah hian fimkhurna leh duhfirna min neih thar phahtir thei se a duhawm hle a ni.
Tribal certificate hi DC Office aṭanga lak chhuah ṭhin ni mahse, dilnaa lehkha thil tel tur zingah Local Coucil / Village Council leh YMA hriatpuinate thil tel a ngai ṭhin a, chuvangin, hetiang lehkha pawimawh siamsak ṭhintu khawtlang hruaitute pawhin lehkha an siamsakna kawngah an fimkhur a ngai a, an kutah ram leh hnam himna a innghat tih an hriat a ṭul takzet a, Supreme Court-in an pa-te tribal ni lo chu tribal-a chhiar theih an ni lo tih thuremna a siam tawh kalh hian, tribal-a chhiar tel loh tur tu tute emaw chuan, tribal certificate hi an lo hûm fur tawh lovang tih sawi har tak a ni tawh a ni.