Nimin khan Serchhip District AH &Vety Department buatsaihin Vawk pul hri African Swine Fever (ASF) hri leng thawh hnihna thleng mek chungchang sawihona AH & Vety Conference Hall, Serchhipah neih a ni a, he huna kal khawmte chuan District pawn aṭanga vawk lakluh khap an duh thu an sawi a ni.
Nikum lama ASF hri leng avang khan vawk engemawzat a thi a, chhungkaw tam tak innghahna leh an eizawnna tam tak a chhia a, ASF hri leng tuar chhungkuate an khawngaihthlak hle a ni.
He vawk hri leng hi a len tawhna hmunah a darh chak hle a, a kai tawhte enkawl damna a awm loh avangin he hri kai vawkte chu an thi deuh vek tih kan hre tawh a, tunah hian Mizoram hmun ṭhenkhatah he vawk hri hi a lêng leh mek a, vawk engemawzat chuan an thihpui leh tawh a, hetihlai hian tun dinhmunah chuan kan District-ah he hri hi a la darh lo niin hriat a ni a, chuvangin, he hri leng laka theihtawpa lo invenlawk hi kan mamawh a ni.
He hri leng laka kan invenna atan hmun dang aṭanga vawk leh vawk sa leh, vawksa aṭanga siam eitur laluta sumdawng ṭhinte pawh an insum rih a ṭul hle a, kan fimkhur loh avangin mi tam takin an tawrh theih bakah, keimahni ngei pawhin hun rei tak kan sumdawnna a tawp phah thei tih kan hriat a ṭul a, hei mai bakah hian he hri hi vawk aṭang chauh ni lovin, ram hnuaia awm sanghalte pawhin an put darh theih avangin ramvak mite thlenga kan fimkhur a ṭul a, sawrkar thuneituten hemi kawnga kan invenna tur kaihhruaina an siamte hi mipuiten ṭha taka kan zawm a ṭul takzet a ni.