Home » Chanchinthar » Editorial: Heroin do kawngah nasa zawka tan lak a tul takzet tawh

Editorial: Heroin do kawngah nasa zawka tan lak a tul takzet tawh

Tun hnaiah Serchhipah ni 2 chhung lekin heroin ṭhahnem tak, hawng 110 teh meuh mai man a ni a, hun engemawti kalta aṭang khan Mizoramah Heroin a hluar nasa hle a, kan ṭhalai zingah a ti pawh an pung nasa a, tun dinhmunah phei chuan manganthlak khawpin he damdawi ruihhlo hian kan ram a chiah mek a, kan ram leh hnam hma lam hun turah hian he ruihhlo hian nghawng ṭha lo a nei ngei dawn niin a lang mek a ni.

He damdawi ngawlveiten ruih nana an hman piah lamah he damdawi hian ken tel tam tak a nei a, rukruk a tihluar a, nupa tam tak an inṭhen phah a, HIV positive an pun phah a, ṭhalai tam tak hma lam hun tur tichhia-in, kan ṭhalai fing tak tak leh lehkhathiam tak tak te, infiamna ti thei leh chak ṭha tak takte chu engmah ni lovah a siam mek a, khawtlang a ralmuan loh phah bawk a, heng zawng zawng piah lamah hian heng ruihhlo ngawlvei kawltu chhungkaw tam tak chuan an tlakranpui mek a, he ruihhloin a nghawng mek chhungkuate tawrhna hi a rapthlak tawh hle a ni.

Tunah hian kan ṭhalai naupang tak takte chuan he ruihhlo hi intihhmuhin, a bawihah an lut mek a, nakina kan khawtlang leh kan ram hruaitu tura kan hual leh kan nghahfak tam takte chu he ruihhlo-in min eichhiatsak mek a, kan hnamin dinchhuahna atana a mamawh, chi inthlah pun zelna kawng thlengin he ruihhlo hian a nghawng dawn niin a lang a, hei vang hian kan ram leh hnam, kan sakhua thleng hian a la tuar dawn niin a lang. Chuvangin, he ruihhlo do kawngah hian, sawrkar, tlawmngai pawl, kohhran leh mimal tin hian tih tak zeta tun aia nasa zawka ṭan kan lak a ṭul tak zet zet tawh a ni.

Leave a Reply

This site uses Akismet to reduce spam. Learn how your comment data is processed.