Tuna kan sawrkar hrawn mek chuan an flagship programme SEDP chu chhungkaw mal hnena ṭanpuina pe turin kalpui a tum ṭan ta niin a lang a, nimin khan Serchhip District SEDP Committee pawh ṭhukhawmin, Village Level SEDP Committee member turte pawh an ruat a ni.
Sawrkarna chelh mektuten sawrkarin flagship programme a kalpui SEDP hnuaia an hnathawh leh hmalak tawh te, an hmachhawpte an sawi nasat piah lamah, eptute pawhin sawrkar beihna atan an hmang nasa hle bawk a, tunah hian mipui tam zawkin sawrkarin an flagship programme an kalpui dan tura an beisei ang, chhungkaw mal hnena ṭanpuina pek chu kalpui turin sawrkar a inbuatsaih mek a, hemi hun nghak-hleltute tan chuan thu lawmawm tak a ni ngei ang.
Hetianga chhungkaw tam takin eizawnna bul an ṭan theihna tura chhungkaw mal hnena ṭanpuina sem hi sawrkar hmasa lamah pawh NLUP hming vuahin sawrkar flasgship programme-a kalpui a lo ni tawh bawk a ni.
Hetianga sawrkarin flagship programme a kalpui ṭhinte hi ramin hma a sawn theihna tur atan duan a ni a, sawrkar flagship programme kalpuina atan hian sawrkar chuan sum tam tak a sengral ṭhin a, amaherawhchu, sawrkarin sum tam tak sengral mahse an flagship programme hi ram mipuiten an hlawhtlinpui a, an ṭhatpui a nih chuan sawrkar hian sum tam tak a senral aia tam hi hlâwkna a hmu lêt ang a, ramin hma a sawn phah ngei tura ngaih a ni a, chuvangin, tuten emaw an hlauh lawk anga he sawrkar flagship programme hi party mite induhsakna leh party insawhnghehna atana ngaih theih tura kalpui a nih chuan he programme hi sawrkar flagship programme-a ngaih theih a ni lo ang.