Home » Chanchinthar » Editorial: Dân phal loh thil inhriatthiamna nena kalpui theih reng hi a him lo

Editorial: Dân phal loh thil inhriatthiamna nena kalpui theih reng hi a him lo

Chief Minister hoa Council of miniser ṭhukhawm chuan Mizoram Liquor (Prohibition) Draft Rules, 2022 chu a pawm a, hetah hian grape wine siam leh zawrh khap a ni a, hetihlai hian Mizoram chhunga thlai thar aṭanga siam chhuah tam ber leh ram pawna thawn chhuah nasat ber pawl, Champhai leh Hnahlan-a grape thar hmanga wine siam mek chu sawrkarin hriatthiamna a nei thung a ni.

He dân duan a nih hma daih hian Champhai leh Hnahlanah hian chhungkaw tam takin grape chingin, an grape thar chhuah aṭangin wine pawh hun engemawchen an lo siam tawh tih hriat sa a ni a, heti chung hian he danah hian grape wine siam leh zawrh khapna dah a ni a, hei vang hian he dan hi pawm a nih hma aṭangin sawiselna a nasa hle a, amaherawhchu Grape Wine siam khapna hi paih lovin he dân hi pawm a ni zui ta tho a, mahse sawrkar chuan dânah khapna awm mahse Hnahlan leh Champhaia grape wine siam chu hriatthiamna neiin, tunah hian an la siam chhunzawm zel tho a ni.

Hetiang deuh bawk hian sawrkar hnuaia hmasawnna hnathawhah contract hna inleichhawnsak a ni fo a, register contractor ni lem lote pawhin contractor dang hming hawha hna thawkte pawh an awm ve reng a, hengte hi dân phal loh ni mahse sawrkar hotu liante pawhin an hriatpui tho niin a lang.

Hetianga dânin a phal loh thilte sawrkar hotu liante hriatpuia kalpui reng theih tho hi dân lekkawhna kawng leh, sawrkar kalphungah thil him lo tak niin a lang a, dânin khap thilte hriatthiamna nei chunga kalpui phal zel ai chuan khapna dan siam loh law law hi sawrkar kalphungah a him zawkin a rinawm.

Leave a Reply

This site uses Akismet to reduce spam. Learn how your comment data is processed.