Mizoram sawrkar hnuaia Finance Department chuan kum 2022 – 2023 chhunga hman tur Budget-a sawrkar hnathawkte hlawh a kum hmasa aia dah tlem thuah sawifiahna a siam a, sawifiahna an siamah chuan Budget buatsaih dawn hian Department tinah an hlawh mamawh zat tur hisap chu Finance Department-ah pe tura hrilh vek an ni a, hetah hian a tlangpuiin Department-ten an venthawn leh ṭhahnem ngaihna avangin an pe tam hle ṭhin tih an sawi a, a tlangpuiin hlawh tura Budget-a dah hi hman sen a ni ngai lo tih sawiin, kumin kum kal ta 2021-2022 kum chhunga hlawh tur Budget-a dah pawh kha tuna chhût chhuah tawh chinah chuan cheng vaibelchhe 336 zet hman zawh lohin a awm tih an tarlang a, hei hi chhut chhuah kim vek hunah phei chuan cheng vaibelchhe 400 chuang zet tling tura ngaih a ni an ti bawk.
Sawrkar Budget hi kum khat chhunga sawrkar sum chetvel dan tur ruahmanna a nih avangin, sum ruahman dan dik leh dik loh hian ram leh mipui hmasawnna leh kalphung a hril thui em em a, chuvangin, budget-a sawrkar sum chetvel dan tur hi uluk taka duan ṭhin a ni.
Kumina Mizoram sawrkar budget-ah nikum lama sawrkar hnathawkte hlawh tura sum dah aia kumina sum dah a tlem zawk chungchang chu tunhnaiah sawi chhuah a ni a, hemi chungchanga Finance Department-in a sawifiahnaah hian a tlangpuiin, hlawh tura budget-a dah chu hman sen a nih ngai loh thu leh kum 2021-2022 chhunga hlawh tura budget-a dah pawh cheng vaibelchhe 400 vel zet hman zawh loh awm tura ngaih a nih thu an sawi a, hetianga budget-a sawrkar sum hmanna tur chhût sual nasat hi a pawi hle a, tuna sawrkar hnathawk hlawh atana an hman zawh loh zat tura an ngaih cheng vbc. 400 hi sawrkarin ṭangkai taka a hmanna tur lo ruahman se chuan he sum hmang hian sawrkarin kum khat chhung chuan sum tam tak lakluh belh nan a hmang thei ngeiin a rinawm.
Budget siamnaa a harsa lo berte zinga tel tura ngaih, sawrkar hnathawk hlawh tur hi a dik chiah chiaha chhut lawk theih ni bik lo mahse sawrkar hnathawk zat hriat sa leh pension tur zat hriat sa, an hlawh pun dan kalphung pawh hriat sa nih avangin hetiang zata tama chhût sual a ni thei hi a mak a, a chhût sual nasa deuh department-te pawh an hriat theihin a rinawm a, dik zawka chhût chhuah a nih theihna tura hmalak a ngaihna laia hmalak a ṭul niin a lang.