Home » Chanchinthar » Editorial: Kawng laihna leivung paih dan chungchang bawk hi

Editorial: Kawng laihna leivung paih dan chungchang bawk hi

National Highway 54 kawng laih zauh hna thawh mekah, Serchhip leh Keiṭum inkar kawng laih zauh hna thawktu, KRAM Infracon Pvt. Ltd. hnuaia sub-contractor pakhatin a remchang laia leivung a paih ṭhinin Serchhip Mat phaia leilet neitute tan harsatna a thlen dawn nia a lan avangin, Zawlpui phaia leilet neitu inhlawmkhawmna pawl, Zawlpui Field Management Committee (FMC) leh sub-contractor-te chuan nimin khan Serchhip Police Station-ah hemi chungchang hi an sawiho a ni.

NH-54 laih zauh hna thawh hi thawh zawh a nih hunah chuan he kawngin a paltlang khuate bakah Mizoram chhim lam hmasawnna atan a ṭangkai hle tura ngaih a ni a, he kawngpui hi kan hmasawnna tur atana pawimawh tak a nih rual hian a laih zauh hna thawh meknaah hian hnathawktuten hna thawh dan tura ruahmanna awmsa anga hna an thawk lo a nih chuan kan ramin kawng tam takah kan chhiatpui thei dawn niin a lang.

A bikin kawng laihna leivung hian harsatna min siam chho mek niin a lang a, kawng laih hma hian leivung paihna tur hmun, Spoil Bank hi hmun hrang hrangah ruahman sa a ni a, leivung paihna tur ruahman sa a nihna chhan hi kawng laihnaa leivung tam tak laih chhuah turin thil awmdan phung pangngai sa, environment a tihchhiat nasat lutuk lohna tur atana duan a ni a, Km. 381-a thui NH-54 laih zauhna turah hian Spoil Bank hi 115 lai ruahman sa a awm a, kawng laihnaa leivung laih chhuah ngai tur zat an chhut chhuah aṭangin kawng siamnaa leivung hman leh tur zatte an chhut chhuak leh a, chumi bak leivung hman loh tur la awmte dawl zo tur chuan Spoil Bank hi ruahman a ni a, hetihlai hian hnathawktute hian leivung hi a paihna tur hmun ni loah an paih nasa hle niin a lang a, hei hian kan ram thing leh mau leh, nungcha, kan lui kawr thlengin a tichhe mek niin a lang a, kawngpui ṭha kan neihna kawngah hian kan tuihna tam tak a bo phah ang a, kan lui tui te kâm phahin, kan ram nungcha leh, thing leh mau tam tak kan chân phah maite pawh thil hlauhawm tak a ni a, hemi thleng lo tur hian mipui mai ni lo, sawrkar pawh hian kawng siam hna thawh dan hi uluk zawkin vil thei se a duhawm khawp mai.

Leave a Reply

This site uses Akismet to reduce spam. Learn how your comment data is processed.