Mizoramin furpui kan thlena kan tawrh ziah chu leimin / leitawlh vanga harsatna thleng hi a ni a, hetianga ruahtui vanga harsatna hi khawvel ram dangte pawhin an tawk ve fo a, amaherawhchu, keini ang ram, ram rethei leh khawpui indin dan ruahmanna fel awm lohna hmun hian kan tuar nasa ṭhin niin a lang.
Ruahtui avanga leimin / leitawlhte hi ṭhenkhat chu khuarel chhiatna ni bawk mahse a tam zawk hi chu mihringten kan siamchawpah a puh theih awm e. Leimin kan siamchawp dana langsar tak pahnih chu engemaw atana lei kan laih ṭhin leh tuihawk luanna mumal lo lutuk hi a nih a rinawm.
Tun ṭumah chuan tuihawk chungchang hi lo thlur bing bik ila, tun hma lam aiin tuihawk hi kan nei tam ta hle mai a, hei hi a chhan nia lang chu lei chhunga ruahtui a luh theih lohna hmun kan neih tam tawh vang a ni a, kan in leh lo mai bakah kan khawlai leh tualzawlte chu tui luhtlang theih lohin kan siam nasa tawh a, chutihlaiin ruahtui luanral zung zungna tur ṭha tawk kan siam leh si loh avangin hmun hniam lamah a luang khawm a, hei hian tuihawk a siam tam a, tuihawk luan ralna mumal tak siam lohna hmunah phei chuan ni khat lek chhung pawhin tuihawk hian ram leilung hmel tidanglam thei khawpin kan ram leilung a ei hêk thei hial a, hei hian leimin a siam phah ṭhin niin a lang.
Hetiang hi a nih avang hian tuihawk luanna mumal siam kawngah hian ṭan kan lâk hle a ngai a, sawrkar thuneitute mai bakah khawtlang hruaitute pawh hian kan theihna chin chinah mahni huam chhungah chuan tuihawk luanna tur ṭha leh tam zawk kan neih theih nan hma la ila, hei hi kan himna atana ngaih pawimawh ngai tak niin a lang.