Mizoram State Cooperative Union (MSCU) Board of Director’s Meeting chuan Cooperative Society chu ram economy siamṭhatna leh ei bar zawnna atana hmanraw ṭha leh pawimawh tak a nih avangin, Zoram mipui, zirlai leh ṭhalai lehkhathiam zawkten an lo hriatchian theihna tur atan Mizoram sikul zirlaibu subject pakhata ‘Cooperative Society’ telh ve dan tur chungchang an sawiho a ni.
Fiamthuin “Mizote hi khawvela pawl (Association) din awlsam ber leh, mihring awmzat a zira pawl (association) nei tam ber kan ni ang,” an ti ṭhin a, a dikna chen pawh a awm âwm e, Mizo hnam chu inkawmkhawm leh a huhoa thil tih nuam ti kan nih avangin, ram leh khaw pum huap chu sawi lohin dah ta ila, veng thler khat huap te, school bil, office bil, mahni hnathawhna kawng zawhpuite nen pawl kan din zung zung a, heng kan pawl dinte hi kan ṭangkaipuina tam ber chu chhiat ni ṭhat ni-a intuamhlawmna atan te, hnathawh ang thawkho kan inkhuahkhirh theihna atan leh kan hamṭhatna tur atana sawrkar nawr a ṭul huna nawr nat a awlsam zawkna atana dinte kan tlangpui a ni.
Hetianga pawl din kan awlsam viau lai hian kan hnathawhna kawnga kan hmasawnna tur leh, keimahni bakah khawtlang leh ram dinhmun chawisanna atana ṭangkai tak, pawl member-ten mimala a hlawkna an têl theihna tur, Co-operative Society lamah hian duh angin kan la ṭhangharh tawk lo hle niin a lang a, Mizoramah hian Co-operative society hlawhtling tak takte chu awm ve bawk mahse, tuna kan dinhmunah hi chuan Co-operative society kan neih tam zawkte pawh hi kan kalpui dan a mumal loh avangin kan hlawkpui tur angin kan la hlawkpui tawk lo niin a lang. Kan hnathawhna kawnga pawl (association) kan din tam tak hi Co-operative society-a kalpuiin, tih takzetin hma la ila chuan tuna kan awmna pawl tam tak ai hian kan ṭangkaipui thei zawkin a rinawm.