School Education Minister Lalchhandama Ralte chuan nimina Govt Mizo High School Day of Govemiknights a hmanpuinaah Mizoramah zirna quality education a awm theihna turin sawrkarin theihtawp a chhuah a ni a ti a, Mizoramin syllabus a hman chu CBSE-te nen a inang vek a, zirtirtute pawh national norms-ah qualified an tih chin vek, trained chhuak vek an ni a ti a, hetiang a nih avang hian zirlaiten hna sang exam an tlin theihna atan All India Standard-ah Mizoram zirna a hniam bik lova, syllabus-te pawh a hniam bik lova, an thluak chuan India hnamdangte a pha a ni a ti a, All India level-a inelnaah pawh Mizo nula tlangvalte chu a langsarah an tel thei tih thinlung pu turin a sawm a ni.
Kan ram zirna hi hun engemawchen aṭang khan a tlahniam a nih loh pawhin zirna lama state dangte hmasawn chak angin kan ram zirna hian hma a sawn chak lo nia ngaih theih turin, hun enge-mawchen chu All India Service-ah Mizoram aṭangin Mizo tling an awm thei ta lo a, sawrkar pawhin theihtawpa beiin, Super IAS-te a tia, India ram khawpui bera coaching an kalna tur a ngaih-tuahsak chung pawhin tling an la awm thei lo a ni.
Hetihlai hian All India Service-a Mizo tling hmasa tam takte kha school ṭha nia an sawia lut lem lo, coaching pawh kal loa inziak tling an awm nual a, khang mite kha an taihmakna leh an tumruhna vanga tling an nih rualin, zirtirna an dawn hmasakna hmun chu Mizorama thingtlang sikulte an ni hlawm a, chuvangin, khatihlaia Mizorama zirna kha All India standard a lo ni daih tawh zawk em ni? tih theih a ni.
Tuna kan zirna standard sâng nia kan sawi leh sawrkar sikul ṭhat tawhziate kan sawi ṭhinte hian a rah chhuah hmuh tur a awm tur a ni a, chutiang hmuh tur a awm lo a nih chuan kan zirna kalphungah hian siamṭhat ngai leh her rem ngai a la awm tihna a ni ngei ang.