“Keini ang State pachhia leh rethei, tharchhuah mumal nei lo, State intodelh lo…..” tiin kan insawi fo ṭhin a, a dik viau a, hei vang hian state intodelh kan nih ve theihna tur leh, state hausa zawkte kan tluk ve theihna tur chuan hmasawnna tur tam tak kan la nei a, hei hi kan ram hruaitute leh sawrkar hotute pawhin an hria a, kan hmasawn-na tur leh kan intodelh ve theihna tur atan kawng hrang hrangin ruahmanna an siam a, hmasawnna hna pawh an thawk a, kan hmasawn dan hi mi tam takin duhkhawp lo viau mahse hma lam chu kan la pan ve zel ni chuan a hriat a ni.
Hetihlai hian ram hmasawnna, khawtlang hmasawnna kan tih hian mi tam tak mitthlaah chuan building ṭha pui pui leh khawl ṭha pui pui, infrastructure ropui deuh deuhte hi kan mitthlaah a lo lang nghal zut zut ṭhin niin a lang a, hetianga building leh infrastructure ṭha pui pui kan ram, kan khuaa inhûng deuh khup a tam hian kan changkang a, hma kan sawn bik viau nite hian a hriat a, a dikna chen pawh a awm âwm e.
Chutihlai chuan sawrkar sum tam tak senga heng infrastructure ṭha pui pui kan dinte hi mipui leh sawrkarin sum leh pai lakluh zuina atana hman ṭangkai zui chu sawi loh, hman ṭangkai zui loh hrim hrim hi tam tak a awm a, hengte hi a lo thlawna sawrkar sum khawhralna dik tak a ni. Heti chung hian tuna kan dinhmun thlir hi chuan ram hmasawnna atana kan hmalaknaah hian construction work hian ngaih pawimawh a hlawh deuh bik em ni tih tur a la ni zel a, tuna kan ram hmasawnna atana kan mamawh ber nia lang zawk chu sawrkar sum kan senna aṭanga mipui leh sawrkarin sum kan hmuhlêt ve theihna tur lam hi ngaih pawimawha kan neih a, helam hi kan bawh nat ve deuh tawh hi kan mamawh tawh chu niin a lang.