Skip to content
Home » Chanchinthar » Editorial: Environment humhalh ngaih pawimawh a tul tawh

Editorial: Environment humhalh ngaih pawimawh a tul tawh

Kan chhehvela khualrel thil (thing leh mau leh nungcha leh thildangte) humhalh kawngah hian inzirtirna kan inpe nasa ta hle a, a ṭul pawh a ṭul tawh reng a ni, amaherawhchu inzirtirna kan inpe nasa viau chung hian hma erawh kan sawn hlei thei lova, thingtlang mite mai bakah khawpuia chengte pawh hian helam hi kan la hlamchhiah hle niin a lang.

Kan chhehvela thing leh mai, nungcha leh khualrel thil dang (Tui, boruak etc.) kan vawn ṭhat loh rah chu a vawng ṭhalotu mihring te bawkin kan seng leh mek a ni a, ram changkang zawkten environment humhalh an lo hlamchhiah vanga an tawrh ang chu, Zoram khawvel pawhin hei hi kan tuar chho ve ṭan mek a ni.

Hetihlai hian ram dangte anga ram changkang nih ve tuma ke pen mek kan la ni a, hemi tura hmasawnna hna kan thawhnaah hian kan environment humhalh hian ngaih pawimawh a la hlawh lo hle a, in ṭha te, kawng ṭha te, bungraw ṭha te, hmanraw ṭha leh Infrastructure ṭhate kan duh ve a, ram changkan kan tihte pawhin a neih sa aia ṭha zawk neih tumin hma an la ve zel tho a, amaherawhchu, ram dangte chuan heng hmasawnna hna hrang hrang an thawhnaah hian environment nghawng chhe lo tur te, a khawih pawi tlem theih dan tur ber kalpui chungin hmasawnna hna an thawk tawh a, a chhan chu heng mihring thil siam ṭha tam tak aia kan chhehvela khuarel thilte hian kan nunna atan hlutna leh pawimawhna an neih zawk vang a ni. Tuna kan dinhmun en hi chuan Red Indian lal pakhat, Chief Sealth-a’n America President, Franklin Pierce hnena a lehkha thawna a ziah, ‘Nunna a tawp ṭan, dam khawchhuahna zawn hun a lo inṭan ta der mai le’ a tih hun hi kan tawng chho ṭan ta niin a lang a, environment humhalh kawngah hian kan zavai a, kan ṭan tlan a ṭul takzet tawh a ni.

Leave a Reply

This site uses Akismet to reduce spam. Learn how your comment data is processed.