Hman khat daih Sarang (Single Use Plastics) chu Plastic Wastes Management Rules 2021 chuan siam chhuah bakah hman leh hralhte a khap tak avangin Mizoram sawrkar pawhin, heng hman khat daih plastic-te tirem tur hian hma a la mek a, hman khat daih Sarangte hi kumin chhunga tirem vek turin sawrkar laipui chuan thupek a tichhuak tawh a ni.
Plastic aṭanga thil siam hi a zangkhai ngaihtuahin a tlo/fei a, hman a nuam a, tin, a man a lo tlawm tel bawk avangin kan hmang nasa em em a, chutihrualin, heng plastic aṭanga thil siamte hi a ṭawih ral ve mai mai theih loh avangin mihringten kan hman duh tawh loh kan paihte hi khawvelah a tam tawh em em a, chu chuan a ṭha lo zawngin nasa takin environment a nghawng tawh a, Mizoramah ngei pawh a kum telin plastic aṭanga siam bawlhhlawh hi a pung nasa zel a, kan lui kawr leh ramhnuaiah pawh a inzam nghek nghuk tawh a, a bikin vawi khat hmana paih nghal mai theih chi plastic aṭanga siam bawlhhlawhte hi a pung chak em em a, hei vang hian sawrkar pawhin a khapna dan a siam ta hial a ni.
Hetihlai hian sawi tawh angin, plastic aṭanga siamte hi a hman a awlsam a, a nuam a, a tlo/fei a, a man a tlawm bawk avangin tun hma aṭangin hmanraw danga thlak tum ṭhin ni mahse a hlawhtling mawh hle a, tunah pawh hian sawrkarin a khap tak avangin a aia hman tur, a thlakna tur siam chhuah a nih theihna tur kawngah hma a la tel nghal a, plastic aṭanga thil siam thlakna tur siamtute pawh sum leh paia puih an nih theih dan turte a dappui nghal a ni.
Hetianga hman khat daih plastic aṭanga thil siamte khap rem tumna kawnga thil pawimawh tak chu a ṭhat lohzia leh a nghawng pawi theihzia mipuite zirtir a, an rilru hneh hmasak a ṭul a, mipuite rilru hneh hmasak a nih loh chuan khap rêm hi thil har tak a ni ang.