Nimin, May ni 22 kha International Day for Biological Diversity a ni a, he ni pual hian khawvel pumah biodiversity hlutna leh mihringte damkhawchhuahna atana an pawimawhna te, biodiversity humhalh leh venhim a ṭul tawhziate inzirtirna hun hman a ni.
Mizoram hi ram chhengchhia leh hmunhma rem lo tak ni mahse biodiversity lamah hian ram hausa tak kan ni a, kan ramngaw leh kan nungcha te kan humhalh ṭha lova, kan tichereu nasa viau chung pawh hian hemi kawnga ram hausa tak kan la ni thei hi a vanneihthlak hle a, chutihrualin, tun ang renga kan ramngaw leh nungchate tichereu zawnga kan kal reng a nih chuan helama kan ram ngaw hausakna hian tawp chin erawh a la nei ngei dawn tih kan hriat a ṭul a, tunah pawh hian kan rama biodiversity hausakna tam tak hi kan titawp mek a ni.
Khawvela nungcha, thil ṭo zawng zawngte hi inmamawh tawn, inring tawn, inzawmna / inkungkaihna nei vek kan ni tih mithiamten an sawi ṭhin a, hei vang hian kan ram ngaw leh nungcha te kan humhalh ṭhat chuan keimahni tan nghawng ṭha a nei ang a, kan humhalh ṭha lo a, kan tihchereu zel a nih chuan mihringte bawk hi a tuartu tur chu kan ni dawn a, chuvangin kan rama biodiversity hausakna kan neih sa venhim leh humhalh kawngah hian theihtawp kan chhuah a ṭul hle a, hemi kawngah hian sawrkar department leh tlawmngai pawl te, mimalte pawhin hma an la ṭhin a, amaherawhchu, hemi kawnga hma kan lak dan hi tun dinhmunah chuan duhthu a la sam lo hle a, hemi kawngah hian mipuite pawh kan la ṭhanhharh tawk lo niin a lang a, hemi kawngah hian tun aia nasa zawka hma lak hi kan la mamawh hle a ni.