Skip to content
Home » Chanchinthar » Editorial: Sawrkarin online-a kalpui theih tur thilah chak zawka hma a lak a la ngai

Editorial: Sawrkarin online-a kalpui theih tur thilah chak zawka hma a lak a la ngai

Nimin khan Lalnunmawia Chuaungo, Chief Information Commissioner, Mizoram Information Commission (MIC) hovin Mizoram RTI Online hmalakna kal mek thlirho niin, RTI Online chu July ni 1, 2022 aṭanga hman ṭan tura peihfel tum a nih thu sawilan a ni a, Mizoram RTI online hi mipuiin awlsam taka an mobile phone emaw computer hmanga RTI zawhna leh a chhanna an hmuh theihna tura duan a ni a, Office-a kal kher lo a, RTI hmanga zawhna a zawh theihna tur leh a chhanna an hmuh theihna tura ruahmanna a ni.

Hetianga Mizoram Information Commission-in mipuiten awlsam zawka RTI zawhna an zawh theihna tur atana ruahmanna a siam hi thil ṭha tak leh hmasawnna lian tak a ni a, sawrkar kal diklo tur ven kawnga a ṭangkai piah lamah sawrkar pawhin a hlawkpui ngei a rinawm a ni.

Internet kaltlanga online hmanga sawrkarin thil tam tak a kalpui hian mipuite tan awlsamna a thlen piah lamah sawrkar tan pawh sum tam tak a senral ṭhin tihzangkhaina atan a ṭangkai hle a, hna thawh a tihawlsam avangin hnathawktu tlem zawk hmangin hna tam tak a thawh theih a, sawrkarin paper leina atana sum tam tak a senna ṭhin a tihtlem phah bawk a, tin, sawrkarin mipui tana hna a thawh leh information a pek chhuah turte mipuite hnenah a thleng rang zawk bawk a, sawrkar langtlang neihna atan pawh thil ṭangkai tak a ni.

Hengte avang hian sawrkar tan chuan sawrkar hna tam takte online-a kalpui hi a hlâwkthlak em em a, hetihlai hian online-a kalpui theih tur sawrkar hna leh kalphung tam takte online-a kalpui loh a la tam hle a, sawrkar hian online-a kalpui theih tur chite hi online-a kalpui a nih zel theihna tura chak zawka hma a lak a la ngai hle a ni.

Leave a Reply

This site uses Akismet to reduce spam. Learn how your comment data is processed.