Nimin khan Social Activist, Vanramchhuangi (Ruatfela Nu) leh Serchhip Ṭhalai Pawl leh Lunglei Ṭhalai Pawl-te chuan NHIDCL-in Mizoram chhunga kawng laih hna an thawhnaa Environment an tihchhe nasa lutuk chungchangah he hna viltu tura ruat District Bawrhsap chu hma la tura phûtin, Serchhip DC Office tualah lungawi lohna an lantir a, Serchhip Ṭhalai Pawl chuan hemi kawnga hma la tur hian DC hnenah lehkha an thehlut nghal bawk a ni.
Mi ṭhenkhat chuan hmasawnna hna thawh a nih chuan Environment a chhe lo thei lo tih ngaihdan an nei a, chuvangin tuna NHIDCL-in kawng an laih vanga thing leh mau tam tak a chereu leh, kan lui dunga leivung inchhek khawl nghek nghukte hi a nih dân tur ve rengah an ngai a, hetianga lungawi lohna lantir pawh hi ṭul an ti lem lo niin a lang a ni.
A ni reng a, kan ram hi tlangram a nih avangin tun hma aṭang tawhin kan rama hmasawnna hna thawhna kawngah leivung kan nei tam a, lei vungte chu kawng thlangah kan hnawl liam mai zel a, mipuiten kan environment a tihchhiat dan lam hi kan ngaihtuah zui vak ṭhin lo a, hnathawktu lam pawhin an ngai pawimawh ngai lem lo bawk a, hei hi thil kalphung pangngai angah kan ngai nghet hle tawh a ni.
Tunhnaiah kan environmentalist-ten nasa zawkin hma an rawn la a, kan environment tichhe lo zawngin hmasawnna hna hi a thawh theih a, khawvelin environment humhalh a ngaih pawimawh tawh avangin hmasawnna hna thawh hma aṭangin ngaih pawimawh hmasak a ni a, environment a chhiat loh dan tur ruahmanna nei sa chunga hmasawnna hna thawh zel a ni tawh tihte mipui hriat turin an tlangaupui a, hei hi mipui leh sawrkar pawhin harh thar nan hman phah thei ila a duhawm khawp mai.