Editorial: Khapna zawm leh kenkawh

Mizoram hmun hrang hranga Vawk pul hri, Afican Swine Fever (ASF) hri leng thawh hnihnaah hun engemawchen Serchhip District a him hnuah tun hnaiah Serchhip District chhung, Bawktlang khuaah a lêng a, hei vang hian State pawn leh District pawn aṭanga vawk lakluh khap a nih bakah District chhung khua leh khuaahte vawk inlak pawlh khap a ni ta a ni.

ASF hri leng thawh khatna kha Serchhip pawhin kan lo tuar tawh a, a rapthlak hle tih kan la hre vek a, chhungkaw tam takin an innghahna leh an eizawnna atana an hman, an vawk an chân nasa hle a, vawk chân nasa tak tak chhungkaw ṭhenkhat chuan vawk vulh bul ṭan leh duh mahse ASF hrilengin a nghawng nat avangin bul ṭan leh hlei thei tawh lo-te pawh an awm nawk a, a ṭhen chuan tunah hian bul an ṭan chho leh mek bawk a ni.

He hri leng kan tawrh tawhna aṭanga kan tawnhriat aṭangin mipui tam tak chu he hri leng lakah hian kan fimkhur tawh hle a, sawrkar lama thawktute pawhin ṭan an lak nasat rahte pawh a nih a rinawm a, ASF hri leng thawh hnihna a lo thlen pawhin hun engemawchen chu kan District chu kan him a, tunah hian kan District chhungah a rawn lut ṭan a, a hma aia kan fimkhur zual a ngai dawn a ni.

Sawi tawh ṭhin angin, ASF hri leng chungchangah hian ran talh ṭhin leh ran hmanga sumdawngte mawhphurhna a sang zual hle a, chumi piah lamah he hri hi vawk chauh ni lo, Sanghal aṭang pawha a darh theih avangin midang pawh kan fimkhur a ngai hle a, he hri leng vanga chhiatna nasa tak kan tawh lohna turin fimkhur i chhuah nasa zual i la, sawrkar thuneitute pawhin nasa zawka khapna an kenkawh a ṭul zual dawn bawk a ni.