Nimin khan Serchhip District Level Monitoring Committee on Implementation of JICA on National Highway 54 member-te chuan Serchhip district chhunga NH-54 laih zauh hna thawh meka leivung an paih dante a hmunah kalchilhin an endik a, he an endiknaah hian Monitoring Committee chuan leivung paihna tura company lamin an lo ruahman tawh hmun pahnih chu pawm theiha an ngaih loh avangin hmun dang dap turin an ti a, hei bakah hian an hnathawha siam belh ngai hrang hrangte hrilhin, leivung paih dan tur chungchang thlengin hrilh an ni a, hetianga Monitoring Committee-ten an hnathawh a hmuna an endik hian tuna NH-54 kawngpui siam mekah hian rah ṭha a chhuah ngei a rinawm a ni.

Sawi tawh ṭhin angin, NHIDCL-in Mizoram chhunga kawngpui hrang hrang an laih zauhnaah kan environment a tihchhiat nasat chungchang au chhuahpuina a nasa hle a, NHIDCL hian an hnathawh turah hna tam tak an thawk tawh a, an leivung paih ringawt pawhin nghawng a nei nasa hman hle tawh a ni.

Hetihlai hian an hnathawh turah thawh tur hmabak tam tak an la nei a, an hna thawh mek ṭhenkhatah phei chuan Stay Order pek an nih avangin an hnathawh chawlhsanna laite pawh an nei rih a ni.

Nimina Serchhip District Monitoring Committee-in an hnathawh a hmuna an endik hi thil ṭha tak a ni a, hna tam tak an thawh hma khan endik ni phei se chuan tun ang hian kan environment a chhe nasa lo mai thei a, chuvangin, an hnathawh leh zel turah hi chuan sawrkarin endik tura a ruat, Monitoring Committee-te ngei hian ngun zawkin an hnathawh hi endik thei tawh se a duhawm hle a ni.