Tunhnai chhoah Mizoramah ruihhlo (Heroin) a hluar hle a, kan ṭhalai tam takin an chhiatpui mek a, a ti thar zingah naupang te te an awm mek niin sawi a ni bawk a, hei hi sawrkar pawhin ngai mawhin, niminpiaha State Working Committee on Ruihhlo Do ṭhukhawm chuan State level bakah District tinah District Working Committee on Ruihhlo Do din nise tiin a rel a, hei bakah hian khua leh veng tinah Village Level Task Force din ni se an ti bawk a ni.
Ruihhlo (heroin)-in heti tak maia kan ram min luhchilh hi kan ram leh hnam hma lam hun atan hian thil pawi tak a ni a, tuna kan dinhmunah phei chuan Excise & Narcotics Department leh Police-ten ruihhlo an man thu hriat tur a awm chho mawlh mawlh a, heng ruihhlo an mante hi Mizoram chhunga vawrh tur mai bakah state pawna kaltlangpui turte pawh a awm a, ruihhlo rawn tawlh luh hi man chhuah aiin man chhuah loh hi a tam fe zawka ngaih a ni lehnghal a ni.
Ruihhlo hian kan ṭhalai, lehkha zir rual leh hnathawk thei rual tam tak nun a tichhe mek a, kan ṭhalai zingah ruihhlo vanga zirna chhunzawm hlei thei lo, hnathawk thei lo, nupui pasal pawh nei hlei thei lo tam tak an awm mek a, chhungkaw tam takin an chhiatpuiin, an tlakran phah a, khawtlang a ralṭi a, tun ang renga kan kal chho a nih chuan kan hnam hian a la tuar nasa dawn hle niin a lang.
Hetiang a nih avang hian kan rama ruihhlo tirem tura sawrkarin hmalak a tumnaah mipuiten kan theihtawpa kan thlawp ṭul takzet a, chutihrualin, kan ṭhalai zingah ruihhlo ngai tam tak kan nei mek a, state level, district level leh village level-a ruihhlo do tura kan inpuahchah meknaah hian ruihhlo tirêm tura hma kan lak rualin ruihhlo ngaite enkawl leh chhawmdawl kawngah pawh ruahmanna ṭha tak kan duan tel hi ruihhlo kan dona kawnga hlawhtlinna kan neihna tur atana thil ṭul tak a ni tih hriain ruahmanna fel tak kan duan a ngai dawn a ni.