Nimina Health Minister Dr. R.Lalthangliana hova ṭhutkhawmnaah Mizorama HIV/AIDS vei tam lam percentage chu India ram puma HIV/AIDS vei tam lam percentage aiin a lêt sawmin a sâng zawk a, kumtina Mizorama HIV/AIDS vei punna chuan hniam lam a pan thei lo tih sawilan a ni.
HIV/AIDS chungchang zirchianna aṭanga a landan leh, helama thawktute sawidan aṭang hian HIV/AIDS chungchanga Mizoram dinhmun hi a ṭha lo hle tih hriat a ni ṭhin a, Mizorama he natna vei punna-in hniam lam a pan hlei thei lo tih hriat phei hi chuan a manganthlak takzet tawh a, a dona kawngah sawrkar, tlawmngai pawl, kohhran leh mimal tinte kan ṭan tlan a ngai takzet tawh tih a lang chiang hle a ni.
Sawrkarin sum tam tak sengin he natna dona leh a darh zel tur venna kawngah hma a la a, amaherawhchu, tun thleng hian mipui mimir hian he natna chungchanga kan rilru puthmang hi a danglam hlei thei lo thung a, a dona leh a darh zel tur ven hna thawh pawh hi sawrkar kutah kan la dah deuh niin a lang a, tlawmngai pawl leh kohhranten he natna dona leh a venna kawnga tha kan thawh ve-na tam zawkah pawh sumtuakna atana hman pah kan la tum niin a lang a, hei hi a pawi hle a ni.
He natna do kawnga tun aṭanga kan ṭangrual loh a, sawrkar kuta kan la innghat zel a nih chuan nakin lawkah kan ram leh hnamin a la tuar dawn a, Kohhranin a la tuar dawn chiang a ni.
Chuvangin, he natna do leh a darh zel tur venna kawngah hian sawrkarin hma a lakna hi tlawmngai pawl leh Kohhrante hian kan thlawp ṭhat mai piah lamah, sawrkar nawrtu ni thei zawk tur khawpa hma kan lak a ṭul takzet tawh a, kan hma zawn ṭheuhah, he natna do kawnga kan tih theih chin apianga hma kan lak a, ngaihtuahna nasa zawka kan sen a ṭul takzet tawh a ni.