Ziak leh chhiar thiam tura inzirtirna ni, International Literacy Day chu nimin khan khawvel hmun hrang hrangah hman a ni a, Mizoramah pawh he hun hi hmangin, ziak leh chhiar uar tura inzirna neih a ni.
Mizoram chu India ramah pawh ziak leh chhiar thiam tamna state kan ni a, Serchhip District phei chu India rama ziak leh chhiar thiam tam berna District kan ni a, tuna kan dinhmunah phei chuan Mizo zingah ziak leh chhiar thiam lo hi chu an vâng tawh khawpin a rinawm.
Hetihlai hian Mizo ṭhalai zingah ziak leh chhiar thiam, zirna lamah pawh sâng tak tak zir thlengte thlengin ziak leh chhiar uar kawngah kan tlahniam nasa hle a, hei vang hian kan ṭhalai tam takte hian an thiamna neih aṭanga mite beisei an phak loh phah fo a, an thlen theih chin tur ang pawh an thlen loh phah fo niin a lang. Tin, mithiam kan neih tam tawh ngaihtuahin mipuite hian kan ṭangkaipui theih tur thuziak ṭha hmuh tur kan nei tlem hle bawk.
Tuna kan dinhmunah chuan kum lama upa zawkte hian ṭhalaite aiin ziak leh chhiar an uar zawk niin a lang a, a tlangpuia lakin tuna kan ṭhalai lehkhathiam tak takte hian hmanlaia kan lehkhathiamte kha thlen chin inangah chuan hriatzauna kawngah kan pha lo hle niin a lang a, tin, thu ziak kawngah pawh tunlai mite hian ṭan kan lak a ngai hle a, thu ziak mi kan tlem nachhan hi lehkha kan chhiar tam loh vang niin a lang. Chuvangin, ṭhalaite hian keimahni nun kan indin chhohna kawng atan leh, ram leh hnam tana mi ṭangkai kan nih ve theih nan ziak leh chhiar kawngah hian ṭan kan lak thar a ngai a ni.