Zothlifim Logo
Loading ...

Thlasik a reh a, khua a lum chho ṭan a, ruahtui a la tlak mumal loh avangin boruak a uap a, khua pawh a lum leh ṭan ta hle a, hei hi kum danga kan ram khaw awmdan ang a ni a, chutihlai chuan tunlai hian social media hrang hrangah Mizoramah ‘Ultraviolet Ray (UV Ray) level a sâng’ tia sawi hmuh tur a tam hle a, hemi behchhan hian zirna in khâr mai rawtnate hmuh tur a awm a, UV Ray sangin mihringa nghawng ṭhalo a neih theihte pawh hmuh tur a tam a, hetih mek lai hian khaw lum vangin state danga zirna in khâr a nih thute pawh hriat tur a awm bawk.

Hetihlai hian Mizoram sawrkar hnuaia Education Department chuan Mizoram Remote Sensing Application Centre (MIRSAC)-a Scientific Officer-te bepawpin, anni lamin khaw lum lutuk vanga warning an la dawn loh thu te, mihring tana tawrh zawh loh leh hlauhawm tur a la awm rih lo an ti a, mithiamte ngaihdan an lak aṭangin tun dinhmunah chuan zirna inkhar tumna a la awm lo, tih an sawi a ni.

Hetianga UV Ray level sâng chungchanga thuthang a awm chuan sawrkar pawhin tehna rintlak tak hmangin kan dinhmun a vil turah ngai ila, UV Ray level sân thu kan hmuhna hi khawi aṭangin nge? tih leh a rintlak em? tihte pawh hi ngaihtuah tham a ni a, khawi foreign website emaw aṭanga kan hmuh vanga chiai viau pawh hi a fuh lo ve thei tho tihte pawh kan hriat a ṭul. Khaw lum avanga state danga zirna in khâr a nih vanga kan rama zirna in khâr rawt chungchangah pawh ram lum dan dinhmun a inan loh avangin state danga an tih anga kal ve ngawt pawh hi a ṭul ber lo thei a, chutihrualin, hetiang thuthang a awm takah chuan sawrkar pawhin heng thil hi uluk zawka vil a, mipuite ṭul loa kan chiai mai loh nan kan dinhmunte pawh mipui hriata a puanzar ve fo hi a ṭha khawp ang.