MNF Party chuan SASCI hnuaia hmasawnna ruhrel siamna tur sum cheng vbc 233.31 hman loha kir leh (lapse) chu Mizoram state leh mipuite tana chânna nasa tak a ni a, a mawhphurtu Finance changtu Chief Minister chuan mipui hnenah ngaihsam dil ngei se an ti.
Nimina MNF MLA-ten Aizawl Press Club-a chanchinbumite an kawmnaah Mizoram Legislative Assembly, Leader of Opposition Lalchhandama Ralte chuan ZPM sawrkar chu SASCI sum ti-lapse-tu an nih thu a sawi a, ZPM sawrkar chuan SASCI sum chu pe chhuak mai loin a suasam chu an la thutak hle tih sawiin, hemi chungchang hi Mizoram Larsap hnenah an thlen dawn bakah a tul angin sawrkar laipui lamah pawh bawhzui zel an tum tih a sawi a ni.
Lalchhandama Ralte chuan tun thla ni 3-a Chief Minister Lalduhoma’n Press Conference a neihah Zoram mipuite hmaah thu dik tawk lo chiang takin a sawi a ti a, Chief Minister chuan MNF sawrkar lai kum 2022 – 2023-a SASCI Part I sum cheng vaibelchhe 200 lapse ang a a sawi chu, thu dik lo a ni a ti a, MNF sawrkar hnuaiah SASCI sum an dawng hmanga hnathawh a nih hnuah an dawn cheng vbc 460 atangin vbc 260 vel an hmang bâng a, chu chu Model Code of Conduct-in a phuar zui tak avangin khawih chet lohin a awm a ni a ti.
Hemi hnu hian ZPM chu sawrkar zui ta-in sawrkar hmasa-in dân ang thlapa PWD registered contractor-te chu hnathawk hlei thei loin an siam a, SASCI hman dan tur hrang hrang dan zamte zawm duh loin he sum hi ZPM sawrkar chuan a kawl tâng lui tlat a, hei vang hian an sum dawn leh tur sancation tawh sa cheng nuai 233 vel chu a lapse ta a ni a ti.
Lalchhandama chuan ZPM sawrkar hnuah contractor hna lo thawk tawhte hna chhuh thensak tuma innawrna a nâ a, an innawr chhung pawh a rei tih sawiin, hetihlai hian Chief Minister chuan contractor work order nei tawhte an tibuailo a ti tlat a ni a ti a, Mizoramah sawrkar a inthlak thin a, contractor-te sawrkar hmasa-in hna a peksa inchhuhsak a awm ngai hriat a ni lo a, he kalphung thar hi a mak hle a ni a ti a, he thil chungchang-ah hian PWD officer-te pawh an khawngaihthlak hle tih a sawi bawk a ni.
Nimina Aizawl Press Club-a MNF Legislature Party-ten chanchinbumite an kawmnaah hian MNF MLA 10-te an tel vek a ni.