Mizo Zirlai Pawl (MZP) chuan Mizoram Public Service Commission (MPSC) hnuaia Mizoram Combined Competitive Examination leh ACF hna lâk dan chhui tura ruat, Inquiry Officer report chu an pawm theilo tih an sawi.
MZP chuan he thila felhlel awm nia an hmuh, hemi avanga MPSC chairman bâng tura an lo phut hial tawh hnuah Inquiry Officer report chu nimin thleng khan MZP hriattir a la ni lo hrim hrim tih an sawi a, a report hi CM Press Conference atangin MZP chuan a hre ve chauh a, tunah RTI hmangin an dil mek chauh a ni an ti a, tuna report siamtu, leh a chhuitu IAS officer pension chuan MPSC hun rei tak lo enkawl tawhtu a nih avangin MPSC mualpho lohna turin thutlukna a siam ta mai em ni? tih hi MZP zawhna a ni, an ti.
Dik lo thei loa inngai, MPSC hna lak dan hi MZP chuan hriatthiam har a ti hle tih an sawi a, hna sâng ber laknaah, answer paper leh mark tabulation-ah correcting fluid nasa taka hman a ni chungin tihsual an nei lo chu MZP chuan mak a ti, an ti a, duhsak zawngte tihtlin theihna kawngka zau tak System – MPSC-in a hmang a, a himlo a ni an ti.
MZP chuan ACF hna lak, exam vek tawh hnua answer paper endik loh tur tih chungchang chu Inquiry Officer hian a chhui tel leh tel loh an hre duh tih an sawi a, Department Recruitment Rules ang ni loa Exam conduct-tu MPSC chuan mawhphurhna lain, exam tawh hnu answer paper hi endik tlang ngei se a duh a, thalai hna zawng mekte inbuatsaihna tithlawn lo se a duh tih an sawi.
MPSC Chairman chhuak ta, JC Ramthanga’n “MPSC Chairman chu bâng tura nawr chi a ni lo” tih amah an thlahnaah a sawi chungchangah MPSC-a thil thleng zawng zawngah mawh laa bâng tur a nih laia, a bâng ngam lo chu MZP chuan a hun kal tawh enin âwm an ti hle tih an sawi a, Addl. Chief Secretary a nih lai November, 2020 khan a makpa chu Covid chhuan-lamin one time relaxation hmangin, Mizoram Engineering Service-a thun tum tawhtu a ni a, MZP hmalakna avangin an ti tlang ta lo mai kha a ni an ti a, Chief Secre-tary nih a duh avangin, a mah aia senior zawk Chief Secretary ni theite nasa taka tibuai tawhtu a ni an ti bawk.
Zirlaite hmalakna avangin Minister, MLA leh mi pawimawh tak tak Mizoramah ngei pawh bân an lo ni tawh tih sawiin, MZP hmalakna avangin, kum 1979 khan Tribal Quota titawp tura Parliament in hnihin a passed tawh pawh India President-in a lo hnawl phah tawh tihte chu JC Ramthanga chuan hria se an duh tih sawiin, Mizoram Sawrkar chuan hun lo la kal zel turah eng dinhmun pawimawhah mah ruat nawn tawh lo se an duh thu an sawi bawk.