Zo Re-Unification Organisation (ZORO) chuan nimin khan Chief Minister Lalduhoma chu a Pisa-ah kawmin, India sawrkarin India leh Burma ramri hung a tum chungchang leh Free Movement Regime (FMR) thiah a tum chungchang an sawipui.
ZORO-in an kawmnaah hian Chief Minister chuan India leh Burma ramri hung a nih loh nan leh zalen taka inkalpawhna dan Free Movement Regime (FMR) hlih a nih loh nan Prime Minister, Union Home Minister leh sawrkar laipui thuneitu hrang hrang a sawipui tawh thu a sawi a, Mizoram bikah ramri hung lo tur leh zalen taka inkalpawhna dan FMR hlip lo turin a ngen tawh tih a lo hrilh a, Mizoram bikah chuan sawrkar laipuiin hma a lak loh mai pawh a rinawm tih a sawi.
ZORO chuan India sawrkarin India leh Burma ramri hung a tum leh Free Movement Regime thiah a tum duh loh lantir nan tun thla ni 16 khian Zokhawthar leh Vaphai hmuna Peaceful Rally an neih tur chung-chang pawh Chief Minister hi an sawipui a, Peaceful Rally neih chu Chief Minister chuan tha a ti a, kawng hrang hranga tantlan a ngai a, kiltin atanga beihho a ngai a ni a ti.
ZORO chuan ni 16 khian India leh Burma border hung leh Free Movement Regime (FMR) thiah tum duh loh lantir nan peaceful Rally Zokhawthar leh Vaphaiah neih a tum a, ruahmanna a kalpui mek a ni.