SERCHHIP: Mizo Students’ Union (MSU) General Headquarters,Aizawl hruaitute chuan nimin khan Vaivakawn Police Station-ah an in sawi ang nilo leh phalna neiloa din nia an hriat avangin Vaivakawn, Aizawla coaching academy pakhat ‘Vaji Rao IAS Academy’ lakah FIR an thehlût.
MSU hian an President Pu PC Lalrinhlua hmingin FIR hi an thehlut a,document hrang hrang thil tel a, FIR an thehluh hi Vaivakawn Police Station-a Officer In-Charge Pu Ramfangzauva’n a lo dawng a, a rang thei ang bera chhui chian an tum thu MSU hruaitute hi a lo hrilh a ni.
MSU chuan he coaching academy hi rinhlehna lian tak a lo neih tawh avangin hun rei tak aṭang khan a lo chhui ru char char tawh tih an sawi a, MSU chuan Mizo ṭhalai lehkha thiamte’n competitive exam an beih mekna ah kan rama coaching academy ṭha leh rintlak, dan dik taka dinte chu engtik lai pawhin a dawngsawng thei reng a, coaching academy mumal lo leh eizawnna atan chauha Mizo zirlaite rawn hmang an awm a nih vaih chuan chung coaching academy leh institution te lakah MSU chuan thikthu a tichhe hle ang, an ti.
Vaji Rao IAS Academy hian Aizawl bakah Lunglei-ah pawh branch neiin tunah hian admission a pe mek a, Police te’n he thil hi an chhui chian hma chu admission pawh lo ti lo turin MSU chuan Mizo zirlaite chu a ngen a ni. He coaching academy hi chhui a nih laiin a neitu nia in sawi Dilip Kumar chu remchang zawnga Mizoram chhuahsan lo turin MSU chuan a hriattir nghal bawk a ni.
MSU-in FIR an thehluha an ziah dan chuan Vaji Rao IAS Academy,Vaivakawn Aizawl hian registration a la nei lo a, tunah hian Ministry of Corporate Affairs ah trademark registration a dil mek a, tih fel a la ni lo tih an sawi a, Delhi based Institute tiin adverstisement tualchhung chanchinbu leh local TV-ah nasa takin tih a ni a, hei hi dâwt a ni tih sawiin, Delhi-ah Vajirao IAS Academy hi a awm lo a, registration a dilna address a ziahlanah hian he academy hi a awm lo a, Mizoram chiah hi Vajirao IAS Academy a ni a, sumdawnna atan mipui hip turin advertsiement dik lo- false publicity a hmang a hei hi inbumna a ni, an ti bawk.
Hei bakah hian MSU hruaituten June ni 2, 2015 a Vajirao IAS Academy an tlawh ṭumin a neitua sawi Dilip Kumar an kawmnaah faculty a nih thu a sawi a, a lehkha-ah erawh Proprietor tih a ni si a, hei hi chhhuichian sak turin an ngen a, Dilip Kumar thiamna (Quaification) leh service experienced pawh chhui chiang turin an ngen bawk a.
Advertisement a tihchhuahah free study material tih tarlan a ni a, amaherawhchu study material te hi zirlaiten man chawiin an lei ṭhin nia an hriat chu chhuichian sak turin an ngen a, Teaching faculty atan advertisement-ah Eminent faculty tiin a chhuah ṭhin a, a faculty mebers te credential (Qualification & Experinced) hriatchian sak turin an ngen bawk a ni.