Kuminah thla 3 (January – March) chhungin Mizoramah TB vei mi 595 hmuhchhuah tawh an ni.
Nimin khan Conference hall DHS old building-ah National TB Elimination Programme 1st Quarter 2024 Review Meeting neih a ni a, Dr. Febiola Kharkongor, State TB Officer kaihhruaia meeting neiha report-a a landanin kumin 2024 January leh March thla inkar chhungin TB rinhlelh mi 3761 test an ni a, TB vei mi 595 hmuhchhuah tawh niin, nikum tun ang hun chhung (January – March) chhung khan TB vei mi 420 hmuhchhuah an ni thung.
Kumin 1st Quarter chhungin MDR-TB vei mi 38 hmuh chhuah an ni a, TB leh HIV vei kawp mi 57 hmuhchhuah an ni a, TB vanga thi hi 5% niin, TB tihdam zat hi 77% a ni a, TB vei hmuhchhuah zingah hian 6% te chu zunthlum nei an ni a, 33% chu vaihlo kaihhnawih ti niin, 16% chu zu in mi an ni bawk.
He hunah hian TB laka inven dan TB Preventive The-rapy chungchanga hriattur pawimawh sawi a ni a, an khâka hrik hmuh Chuap TB vei chenpuite chu TB an vei leh vei loh endik vek a, TB an vei loh chuan TB vênna hi an lak a ngaih thu te, chuap TB khâka hrik hmuhte chuan an chênpuite TB an kai darh mai a awlsam em avangin an chênpuite hian TB vênna an lâk a pawimawh thu sawiho a ni a, TB vênna hi la duh lo an awm nual thu tarlan a ni a, la tura intihluih theih ni lo mahse hei hian TB kai lo tura a vên avangin chuap TB vei chênpuite chuan an lâk ngei a pawimawh thu tarlan a ni.
January – March, 2024 chhunga District tina TB hmuhchhuah dan:
- Aizawl – 433
- Champhai – 24
- Kolasib – 46
- Lawngtlai – 27
- Lunglei – 34
- Mamit – 5
- Siaha – 16
- Serchhip – 10