Nestle Company siam ‘MAGGI’ noodles hriselna atan a thalo tiha sawi chung-chang chu sawifiahin Health Department chuan, Maggi chu hlauhawm thar thuta ngai an awm avanga chiai ta mai an awm nia sawiin, tun dinhmunah engmah chiaina tur a awm lo a ti.
Mizoram sawrkar hmalak-na sawiin, India ram chhunga ei leh in hriselna food safety enkawltu lama thuneitu sang ber Food Safety and Standards Authority of India (FSSAI) chuan, State ṭhenkhata ‘Maggi’ noodles test result avangin India rama State zawng zawngte chu mahni State chhung ṭheuha Maggi te chu Food Testing Laboratory ah test tur leh a result pawh Central a thawn nghal vek turin hriattirna a tichhuah angin Mizoram pawhin Maggi a test theih nan Assam Public Health Laboratory a dawr mek a, tun aṭanga rei lo te ah Maggi test turin thawn tur a ni a, hei bakah hian Maggi chauh ni lo, eitur chi hrang hrang he laboratoryah hian test zui zel tura ruahmanna siam a ni bawk a. He mi chhung, result hriat hma chuan mitin te fimkhur turin an hriattir a ni.
Tun dinhmunah FSSAI chuan fimkhur thuah Nestle Company chu an Maggi siam mek te titawp a, hralh chhuah tawhte pawh la kir turin thupek a chhuah a. Mizoramah pawh Food Safety hnathawk te chuan he Maggi laklet dan enfiah pui tura a hriattir angin tunah hian Food Safety Officer ten Maggi laklet dan hi uluk takin an en zui a ni.