Skip to content
Home » Chanchinthar » Ramri chungchanga an thawh ṭhat vangin MNYF-in Vairengte Auto Rickshaw Association te chawimawina an hlan

Ramri chungchanga an thawh ṭhat vangin MNYF-in Vairengte Auto Rickshaw Association te chawimawina an hlan

ZNP ṭhalaiten an thil tih tum tihkhalhah MNYF an puh

Mizo National Youth Front (MNYF) Headquarters, Aizawl chuan nimin khan Vairengte Auto Rickshaw Association te chu ramri humhalh chungchanga an thawhṭhat avangin chawimawina an hlan a, hetihlai hian Zoram Nationalist Party (ZNP) ṭhalai te chuan an thil tih tum tih khalhah MNF ṭhalaite hi an puh a ni.

Vairengte Auto Rickshaw Association hnena chawi-mawina an hlanna ah hian MNF ṭhalai President MLA Pu Lalrinawma chuan Ram chu a luaha luah fel chi a nih thu sawiin, Ram kan luah sen loh hian ram ruakah midang an lo awm thin a, chutianga midang tana hmun kan ken avangin ramri buai a awm ṭhin a ni a ti a, chawimawina an hlan chuan ṭhalaite rilruah ram leh hnam humhim duhna thinlung neih phah se a duh thu a sawi bawk a ni.

Chawimawina hlanna inkhawm tawi neih ah hian Vairengte Auto Rickshaw Association President Pu Robert Tlangthangliana chuan an hmalak tawhna hrang hrang te a sawi a, inkhawm zawhfel anih hnuah MNYF Headquarters hotute nen Vairengte Auto Rickshaw Stand vel tlawhin thil chinchang an enfiah bawk a ni.

Hetihlai hian ZNP Thalai te chuan ramri chungchang ah party hming tih that nana hma inlak khalh chu pawi an tih thu an sawi a, nimin khan ZNP ṭhalai President Pu Lalmuan-puia Punte chuan ZNP office ah thuthar lakhawmtute kawm-in, MNF Party in hunrei tak chhung sawrkarna an chan laia Mizo Nationalism leh ramri an ngaihthah laia Vairengte Auto Rickshaw Association ten Cachar lam pana tawlh thla zela ramri an zauh ṭhin chu ropui an tih avanga ZNP ṭhalaiin Vairengte Auto Rickshaw Association te chawimawina hlan an tum mek laia a hmaa tumna neilo MNYF-in ZNP ṭhalai tih khalh tum vanga nimina Vairengte Auto Rickshaw Association te chawimawina hlan tura an tlan liam nghal mai chu mak an tih thu a sawi a ni.

ZNP ṭhalai President chuan hun lo kal zel turah Party dangte tih khalh tum vang ringawt nilova anmahni thua ṭha taka Mizo nationalism leh ramri chungchanga hma la ve zel ṭhin tawh turin MNF Party chu an phut tih a sawi bawk.

Leave a Reply

This site uses Akismet to reduce spam. Learn how your comment data is processed.