MHA Border Management Secretary leh Official dangte ramri chungchang sawipui

New Delhi-a châm mek Mizoram Legislative Assembly-a Subject Committee-I Member-te chuan Thawhlehni khan Ministry of Home Affairs Border Management Secretary leh official dangte hmuin Mizoram, Bangladesh leh Myanmar ramri chungchanga harsatna sutkian dan tur leh thil pawimawh tak takte an sawipui.

Subject Committee-I leh MHA meeting-ah hian Bang-ladesh leh Myanmar ramria harsatna awm leh a chinfel dan tur bakah hmasawnna awm thei tur thil hrang hrang an sawi a, Mizoram Legislative Assembly-in kumin March ni 16-a Myanmar ramri hung loh Resolution a lo pawm tawh chu he Committee din tlatna a nih thu an thlen a, Subject Committee chuan state sawr-karin a lo ruahman tawh Myan-mar ramria insumdawntawnna leh inkalpawhna tur hmun – Champhai district-a Zokhawthar, Lunglei district-a Thingsai leh Siaha district-a Lungbun leh Phura khuate chu mumal zawka kalpui a nih thuai theih nana hmalak ni se an duh thu an thlen chu Border Management hotute chuan lo bawhzui an tum thuin an chhang bawk.

Subject Committee-I hi Chairman Pu PC Zoram Sangliana hovin Member 6 – Pu Nihar Kanti Chakma, Pu Vanlalzawma, Pu T.Sangkunga, Pu John Siamkunga, Pu Lalruatkima leh Pu S Laldingliana te an ni a, MHA lam atangin Border Management Division Secretary Pi Sanjivani Kutti, Joint Secretary Pu Pradeep Gupta, Addl DG BSF Pu Maheshwari, Joint Secretary for Northeast Pu Satyendra Garg leh Director Pu Amit Nirmal ten an lo dawngsawng a ni.

Niminpiah vek khan Pute – PC Zoram Sangliana, Nihar Kanti Chakma, T. Sangkunga leh John Siamkunga te chuan Pu Rahul Gandhi, MP, chu New Delhi-a a chenna inah an hmu a, tlaiah Rajya Sabha MP Pu Ronald Sapa Tlau chuan zanriah buatsaihsakin vawiin hian Aizawlah an lo let leh beisei a ni.

Leave a Reply

This site uses Akismet to reduce spam. Learn how your comment data is processed.