MJA Gen. Hqrs. President C.Lalrambuatsaiha chuan nimin chawhnu khan MJA member Malsawmdawngzela Hrahsel, News Reporter, Vanglaini lehkhabu ziah, ‘Kum 10 chhung Budget thlirna’ tih chu Aizawl Press Club conference hall-ah a tlangzarh a, hemi hma hian Aizawl Press Club-ah hian MJA member zinga MAL Book of the Year 2021 dawngtu Lalhruaitluanga Chawngte, News Editor, The Aizawl Post lawmpuina hun hman a ni bawk.
Lehkhabu tlangzarhna inkhawmah hian MJA President chuan, MJA member zinga miin lehkhabu hlu tak a sual chhuak chu lawmawm a tih thu a sawi a, “Kan ram mamawh tak lehkhabu a tichhuak thei hi kan lawmpui a, a dang pawh la tichhuak zel turin ka chah a ni,” a ti a, he lehkhabu hi kum 2013-14 aṭanga kum 2022-23 thlenga kum tina Mizoram budget thlirna a ni a, phek 117-a chhah niin, ₹130/- man a ni.
Hemi hma hian MJA Gen. Hqrs. chuan Aizawl Press Club-ah bawk hian Book of the Year 2021 ‘Hnam ropuite u, tho r’u le’ tih ziaktu, MJA member Lalhruaitluanga Chawngte lawmpuina inkhawm buat-saih a ni a, hetah hian MJA President chuan mi tam takin diary pawh an ziak ṭha peih lo hlawm a, lehkhabu ziah phei chu thil harsa lehzual a nih thu a sawi a, kum 2021 chhunga lehkhabu chhuak 170 chuang zingah a ṭha bera an thlang chu an lawmpui thu a sawi a ni.
Lalhruaitluanga Chawngte pawhin thu sawiin, Book of the Year hi ka beisei miah loh a ni a, kan rilruah a lang pha lo a, ka insit hial zawk a ni, a ti a, Book of the Year a dawn MJA-in a lawmpui avanga a lawm thu a sawi bawk.
MJA chuan Lalhruaitluanga Chawngte hnenah hian Book of the Year a dawn lawmpui nan thuziak leh ₹10,000 a hlan a ni.