Mizo Student Union (MSU) Gen. Hqrs. chuan Mizorama Cement zuartu company hrang hrang te chu nimin tlai aṭanga Cement bag khat Rs.360/-a zuar tura an ngen thu sawiin, an ngenna ngai pawimawh lo te chu an Godown kharsak turin thuneitute an ngên.
MSU chuan Corporate Social Responsibility (CSR) chungchanga hma an lakna kal zelah nimin khan Cement Company chungchang an sawiho a, Mizoramah tun thlengin cement company 8 an awm mek a, chungte chuan Carry and Forward (C/F) neiin, anni hnuaiah hian Dealers awm ve lehin Mizoram pum ah cement an zuar ṭhin tih MSU chuan an sawi a,Mizoram pumin thlakhata cement kan hman ral zat hi bag nuai 3 aṭanga nuai 5 inkar a ni tlangpui tih an sawi.
MSU-in cement rate a zirchianna leh state dangte nena inthlauhna te, sumdawn-na atana hmang lova mahni hman atana State pawn aṭanga leite lei theihna zat te a khaikhin vek hnuin, Mizorama cement rate chu a sâng uchuak hle tih an sawi a, Cement company te hian state danga engemaw chhiatna avanga an sum hloh te hmuh lêt nan Mizoram chu an hmang nasa tih chu an hmuh dan a nih thu an sawi.
Tunah hian company-in Agartala-a cement an tih thlen theihna te, Silchar-a an pekna te, Mizoram chhunga company lian te hnena an pek theihna te nen lam an hriat thu an sawi a, Cement te hi Meghalaya state-a Jowai leh a chheh vel aṭanga rawn phurhluh deuh vek anni a, chumi aṭanga Agartala leh Aizawl hlat zawng inthlauhna hi Km 30 aia tamlo a ni a, Mizo-ram leh anni phaizawla diesel hman zât inthlauhna pawh tam lo tak a ni a, chuti chunga Aizawl leh Agartala a Company-in cement an thlen tir theihna rate hi Company hrang hrang te rate lakkhawmin Rs.80 -100 inkar deuh vek a ni, heti chung hian Agartala leh Aizawl a Company ten tax an pek inthlauhna hi 2% – 5% inkar daih te a ni a, company ṭhenkhat chu Central subsidy hmute pawh an ni bawk a, chung zawng zawng aṭanga MSU in a hmuh chhuah chu heng Cement Company 8 te hian thlakhat chhung a Mizo-ram atanga hlawkna an hmuh chu cheng nuai 200 aṭanga nuai 400 chuang daih a ni a, kum khat a an hlawkna chu Cheng Nuai 2400/- aṭanga Nuai 4800/- te a ni daih tihna a ni an ti.
MSU chuan Company leh C/F te nen meeting vawi thum lai a buatsaih tawh a, heng meeting ah hian Company te chu Aizawl a Rs.360 a zuar vek turin a ngen a, MSU in company te a ngenna in rah ṭha a chhuahlo a nih chuan Bangladesh leh Bhutan lam company lakluh dan tur hial ngaihtuah a ni hman a, chutihlai chuan, MSU ngenna ngai pawimawhin Cement Company pakhat chuan tukin aṭang hian Aizawl khawpui chhungah Cement bag khat (50kg) hi Rs.360/- in an zuar chhuak dawn tih an sawi a, Company dang te pawhin vawiin atanga ni reilote ah hian hemi rate hian an rawn zuar ve tur a ngaih a ni an ti bawk.
MSU in a zirchian hnu aṭanga Cement rate Rs.360/- anga zuar theilo erawh chu Mizorama an sumdawn ve reng a rem lo tih MSU chuan sawiin, MSU ngenna pawh ngai pawimawh lo te chu an Godown khar sak nghal vek turin thuneitute an ngen nghal a, Company dang rawn lut thei te an dâl loh nan a ṭul ang zelin hmalak an tum tih an sawi bawk a, he rate ruahman-na hi tihdanglam a nih leh tawh lohna turin Company te intiam-tir an ni a, Company te inkarah inelna boruak a awm theih nan MSU chuan Mizo mipuite Aizawl khawpui chhung a Cement Rs.360/- a hralh theilo chu dawrlo turin a ngen nghal bawk a ni.