Nimin kha Mizoramin India Danpui hnuaia State anga a inrelbawlna ni champha vawi 32-na a ni a, he ni pual hian Vanapa Hall-ah sawrkarin hun a buatsaih a, Governor Kummanam Rajasekharan leh Chief Minister Zoramthanga ten thu an sawi a ni.
State Day Lawmna thuchah a sawiah, Governor chuan Mizoram chu state a nih theihna tura an theihna zawng zawng leh nunna hlutak lo hlantute zawng zawng zah leh chawimawi chu khua leh tuite mawhphurhna a nih thu a sawi a. Kum 20 hun harsa chu kum 30 chhunga remna leh muana hnuaia hmasawnna ten a thawi dam thawkhat tawh a ni a ti.
State puitling a nih angin achhunga mipuite pawh India Danpui hnuaia khua leh tui te mawhphurhna te tha taka zawmin hmasawnna lamtluang kan zawh a ngai a ni a ti a. Remna leh muanna hnuaiah Mizoram sawrkar chuan hmasawnna ngelghet siam chho mekin Socio-Economic Development Policy leh hmachhawp pawimawh tak tak kaltlangin tan a la chho dawn a. Hengah te hian hlawhtling tur chuan mipuiten sawrkar an thlawp tlat a ngai a ni a ti. Governor chuan Mizoramin thahrui a ngahna lai deuh – Agriculture, Horticulture, Food Processing, Organic Farming, Handloom & Handicrafts leh thildangah te mipui ten sawrkar hmalakna an tuipui leh zual a pawimawh hle dawn tih a sawi a. “Infiamna huangah te, kawngpui tha siam kawngah te tan la chhunzawmin Mizoram hi State dangte entawn, Model State ah kan siam dawn a ni”, a ti.
Chief Minister Zoram-thanga pawhin State Day puala thuchah sawiin Mizoram State lo pianchhuahna chu Remna rah a ni a ti. Peace Accord hlawhtling ber zinga mi Mizoramin a neih theihna kawngah Mizo mipui zawng zawngte, Kohhranmite, Zirlaite, sawrkar hnathawkte leh Mizo National Front( MNF) te thawh hlawk dan a inang tlang vek a. Chuvangin Mizoram State Day chu state chhunga chengte tan mai bakah hmun hrang hrang cheng Mizo mipui zawng zawng te tan a hlu em em a ni a ti a. India ram tana Republic Day leh Independence Day a hlut ang tluk zetin Mizo te tan Mizoram Day hi a hlu a; nakumah phei chuan Organising Committee changtlung zawk ruahmanna hnuaiah ropui taka lawm turin rel a ni dawn a ni a ti.
State awmzia sawifiahin midangte state neih aiin Mizoramin State a neih dan chu a changtlung zawk a, a nghet zawk bawk a ti a. Chief Minister chuan Mizoram state chhunga chengte chuan state dangte neih ang an neih vek piah lamah humhimtu ILP, Inremna Thuthlung( Peace Accord) leh India Danpui chhunga mi – India Danpui lak atang thleng pawha invenna; Mizoram tan bika Special Provision chuanna Arcticle 371 G) a nei leh zel a ni a ti. Mizoram leilung chhung leh a chunglangah hauhsakna haihchhuah tur tam tak a awm tih a sawi a. Heng te hi enge ni tih hriata, rinawmna leh taihmakna nen rilru put hmang thlaka haichhuah chu a chhunga chengte mawh-phurhna leh chanvo a ni a ti.
State Day Celebration programme hi Chief Secretary Lalnunmawia Chuaungo chuan a kaihruai a, Minister te, MLA te leh Sawrkar hnathawk lian te an kal a. Vantlang mipui lam atanga chhimtu pawh thahnem tak an awm a ni.
Kum 1987 February 20 khan Mizoram chu Union Territory atangin dinhmun sang zawkah India ram State 23-na ni tura hlankai a ni a. Atirah District 3 a then niin tun dinhmuh District 8 a awm a ni. Mizoram state zau zawng hi Square Km 21,087 a ni a kum 2011 Chhiarpui a tarlan dan chuan Mizoram State mipui tam zawng chu 10,91,014 a ni a. Mizoram mipui zinga zaa 91.58 ten ziak leh chhiar an thiam a ni.