Tourism Minister Pu S.Hiato chuan ni 22 May 2013 khan E.Lungdar-a Tourist Lodge sak thar a hawng a, a tukah N.Vanlaiphai-a Tourist Lodge sak thar a hawng nghal bawk.
Hawnna thu sawiin Minister chuan Tourism chu ram sum hmuhna hnar pawimawh tak a ni tiin, ram tam takin tourism chu ram dinchhuahna atan an hman thu a sawi a. Mizoram chu Pathianin ram nuam tak, boruak sik leh sa nuam tak, boruak thiang leh tlangram mawi taka a siam a ni a, chu chu khualzin mite hmuh chak ber a ni tiin, chu ram duhawm tak vawn leh enkawl chu a chhunga chengte mawh a ni, a ti. India Sorkarin Look East Policy a kalpui mek chuan thil tam tak a hawng dawn a, khawchhak ram te nena insumdawnna tur pawh kawng min hawnsak dawn a, chumi atana kan lo inbuatsaih a ṭul a ni, a ti bawk.
Minister hi Parliamentary Secretary Pu H.Zothangliana chuan a ṭawiawm a ni.
E.Lungdar leh N.Vanlaiphai-a Tourist Lodge hawn te hi a inangin Building 5 ve ve sak an ni a, E.Lungdar ah Tourist Cottage Type A pahnih, Tourist Cottage Type B pakhat, Tourist Cottage Type B (Dormitory Block) pakhat, leh Tourist Facility Block Type A pakhat sak a ni a, sum Rs. 115.97 lakhs sen a ni. N.Vanlaiphai ah hian Tourist Cottage Type A pathum, Dormitory Block Type A pakhat leh Tourist Facility Block Type A pakhat sak a ni a, sum Rs. 113.32 lakhs sen a ni. Heng sum te hi Ministry of Tourism atanga dawn a ni.
Tourist Lodge hawnna inkhawm hi Tourism Director Pu Vabeiha Hlychho-in a kaihruai a, officials leh khawtlang hruaitu ten thusawina hun an hmang bawk. Tourist Lodge hawnna programme hi Aizawl leh Serchhip atangin Officials thenkhat ten an hmanpui bawk a ni.