AMFU-in E&F Deptt. ngaihdam dil turin phût
Saipum khuaa Hmunphiah chingtute chuan sawrkarin royalty, kg khat zelah `7/- a la ṭhin tih sawiin hei vang hian an hmunphiah te an hralh to theihloh phah niin an sawi.
Zirtawpni kaltaa Aizawl chanchinbumi ṭhenkhat ten an kawm naah Saipum khawtlang hruaitute chuan sawrkarin NLUP hmunphiah ah royalty kg khat zelah `3.50 leh ramhnuai (forest reserved) ami te kg ah `7/- zel lak tur a tih laiin NLUP a an tharchhuah ah pawh `7/- zel royalty a laksak thin niin an sawi a. Royalty a san em avang hian an hmunphiah pawh an hralh to theihloh phah niin an sawi a, Saipum VCP Lalrawngbawla chuan kum dangah chuan Forest department lamin survey te neiin NLUP tharchhuah leh ramhnuai ami te an thliar hrang a, mahse kuminah chuan engmah an tilo niin a sawi.
Hemi chungchangah hian All Mizoram Farmers’ Union (AMFU) chuan thuchhuah siam nghalin, Hmunphiah chungchanga harsatna awm ṭhin te chu Col. ZS Zuala, Parliamentary Seretary i/c E&F Deptt kaihhruainain ni 30 September, 2013 khan PCCF Conference Hall-ah AMFU General Hqrs hruaitute leh E&F Deptt lam te nen inremna neih a ni tawh tih an sawi a, he inremnaah hian Hmunphiah Royalty atan Kg. 1-ah `1/- chauh lak tura Inremna Thuthlung siam a ni a. Hei hian mimal huan / NLUP hnuai a ching VC Pass / P. Patta / LSC a huam vek ang a, Forest Reserve chhung a mite chu dan pangngaiin `7/Kg zela lak tura inremna fel tak siam a ni tih an sawi a, tun dinhmuna Mizoram hmun hrang hranga inremna siam tawh palzuta Hmunphiah chingtute laka harsatna E&F Deptt in a siam chu an dem tih an sawi a, ni 30 September, 2013 hnu lama Mizoram hmun hrang hrang a dik lo taka Royalty an laksak tawhte a rang thei ang bera pe let turin E&F Department an phut tih sawiin, Hmunphiah chingtute pawh Inremna Thuthlung ang a Royalty pe tawh turin an hriattir bawk a. Hetianga kuthnathawktute dinhmun ngaihtuah lek lova harsatna hrang hrang siam sak a, Inremna thuthlung palzut tu PCCF, E&F Deptt chu ni 15 February, 2014 hma ngeia ngaihdam dilna siam turin an phut tih an sawi bawk.