India News

Hmingchungnunga Hailakandi-a hren a nih hnu-ah chhuah leh

Hmingchungnunga (42) h/o Lalrami, Bairabi Rimawi veng chu February 4, Thawhlehni chawhma dar 11 vel khan Vai sumdawng Hailakandi, Assam lam mi Alta tia hriat leh Hussein-a ten a hnen aṭanga Teak lei duh anga insawiin, midang hmangin an bum chhuak a, Hailakandi-a Alta Ina an hren hnu leh a hnu lama Hailakandi PS Lock-up a an hren zui leh hnu-ah Nilaini tlai dar 3 vel khan Bairabi Police ten a tanna aṭanga la chhuakin, Nilaini zan dar 6:30 vel khan an khua Bairabi an thlenpui.

Bairabi khawtlang hruaitute sawi danin, Hailakandi Vai sumdawng Alta-a leh Hussein-a te hi Mizoramah Teak hmanga sumdawng ṭhin an ni a, Hortoki khua ami Selṭhuama’n an pawisa `4,41,000/- a batsak niin an sawi a. Heng an pawisa inbat sak chungchangah hian a hriatpuitu nia an sawi Hmingchungnunga hmang hian pawisa an hmuh let theih nan hma an la nia hriat a ni.

Alta leh Hussein-a te hian engemawchen chhung Alta In a an hren hnu-ah Bairabi Police te leh khawtlang mipuite boruak an hriat avangin Hailakandi PS ah FIR thehlutin Hmingchungnunga hi Lock Up ah khung zui a ni a, Nilaini chhun dar 12:00 hma ngeia an pawisa ba hi pe tura hmala turin Hmingchungnunga chhungte hnenah hian an hriattir a ni.

He thil thleng an hriat veleh hian Bairabi Police, VC te leh All NGO te chuan theihtawp chhuahin hma an la a, Thawhlehni zan khan Bairabi Police te chuan Hailakandi pan nghalin Hailakandi PS Lock Up ah hian an zuk riah chilh a, Nilaini khan Kolasib SDPO & Magistrate ten hma la chhunzawm zelin Hailakandi Police hotute nen inbiakna hi kalpui a ni a. Inbiakna tluang taka neiin Nilaini tlai dar 3 vel khan Hmingchungnunga hi rawn chhuah a ni a, Nilaini zan dar 6:30 vel khan Bairabi thlenpui a ni.

He thil thleng avang hian Bairabi Joint YMA huaihawtin Bairabi leh a chhehvela vai motor mau phur te chu Bairabi Rel Crossing-ah dan a ni a. Inbiakna tluang taka kalpui a nih avang leh Pu Hmingchungnunga chhuah a nih tak avang hian buaina dang engmah thleng lovin Nilaini tlai dar 6:00 vel khan motor an dan te hi an chhuah zui ve leh nghal bawk.

Hemi chungchangah hian Bairabi khawtlang mipuite leh NGO hruaitute chuan pawisawilo Mizo te chunga hnamdang ten hlei an len ṭhin chu pawi an ti tak zet tih an sawi a, tun hnuah thleng tawh lo se an ti tak meuh tih an sawi bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram