Real Madrid hnawt chhuaktu Fernando Torres

Copa del Rey round of 16 2nd leg inkhel hmuhnawm takah Real Madrid chuan mikhual team Atletico chu an khelmual Bernabeu-ah 2-2 in draw mahse 1st leg a 2-0-a an lo tlâwm tawh avangin Copa del Rey atanga hnawhchhuah an ni ta.He inkhelah hian hmanni lawka Atletico Madrid-a kir leh ta, Fernando Torres chuan inkhel ṭan aṭanga minute 1 lekah goal a thun nghal a, Minute 20-ah Real Madrid chuan Ramos hmangin an siphurh an sut a, Halftime thlengin goal dang a lut lo.

Second half-ah pawh ṭan aṭanga minute 1-na lekah Torres bawkin goal thun leh nghalin, Atletico Madrid chu hma a hruaipui leh a, mahse minute 54-naah Cristiano Ronaldo chuan an si phurh a rul a, Inkhelh tawp thlengin goal dang a luh belh lova, 2-2 in inhnehtawk mahse 1st leg-a an inkhel tawhna nena belhkhawmin 4-2-in Atletico chuan Real Madrid chu an hneh ta a ni.

He inkhelah hian Torres hi a khel ṭha hle a, Atletico tlar hnung pawh an khawng leh hle bawk.

Tun season a Madrid derby khelh hnuhnung 4 zinga 3-ah Simeone-a naute hian Real lakah hnehna an la chang vek bawk a ni.