ACB hi hlemhletna laka sawrkar venpuitu ṭha tak a ni:CM

Chief Minister Pu Lal Thanhawla chuan ‘Anti Corruption Bureau (ACB) hi hlem-hletna leh eirukna laka sawrkar venpuitu ṭha tak a ni’ a ti.
He thu hi nimina New Secretariat Complex-a Anti Corruption Bureau office building thar a hawnna a a sawi a ni a, Chief Minister chuan hetiang building sak ṭha tak mai an nei thei hi a sak hun chhunga officer ten uluk taka an vil ṭhin vang a ni a ti a, Mizoramah contract hnaa in sakte hi a sak laia enkawl ṭhat tawk loh avang leh vil uluk ṭhin loh avangin a sak a chhia a, mipuiin an tuar ṭhin a ni a ti.

Chief Minister chuan police ten building (police housing) an nei chau hle tih sawiin, hei hi central sorkarah pawh thlen tawh thin a ni a ti a. Building siam ṭhat leh chei ṭhat ngai battalion headquarters ah te tam tak a awm tih sawrkar chuan a hria a ni a ti a. Police te hi mipui thlamuantu an nih rualin, misualte tan ṭihbaiawm an ni thung a, chutiang chuan hna an thawh a ngai a ni a ti a, ACB hnathawk chhawr tlak an awm hi a lawmawm hle a ni a ti.

ACB building thar hi cheng nuai 455.57 senga sak a ni a, chhawng 6 niin, a hmun luah zauh zawng hi 1843 sqm a ni. A satu hi class-I contactor Pu T.Thanzaua, Electric Veng a ni a, ni 23.02.2013 khan sak hna ṭanin, ni 28.02 2015 ah sak zawh a ni.

ACB hi ni 2nd Feb 1976 khan IGP enkawlna hnuaiah Anti Corruption Branch tia din a ni a. Kum 1981 ah Chief Vigilance Officer cum Chief Secretary hnuaiah dah leh a ni a. Kum 2008 kumtir khan Anti Corruption Bureau tia thlakin Chief Vigilance Officer enkawlna hnuaiah dah leh a ni. Tunah hian IPS officer Director in hoin, an vaiin hna-thawk-tu police department atanga lakkhawm mi 84 an awm mek a ni. ACB hian hlemhletna leh eirukna chhuitu, criminal investigation hna thawkin intelligence agency a ni bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram