Bru lâklet tur enfiah tan ni-ah Bru inlan awm lo

Bru laklet tur te Mizoram mi diktak an nih leh nih loh nimin aṭanga enfiah ṭan turah, Kaskau Camp-a awm te pakhatmah an inlan lo.
Tun thla ni 8 aṭanga Bru laklet hna thawk turin Mizoram mi dik tak te endik hna chu nimin aṭang khan Tripuraa Kaskau Relief Camp ah ṭan a ni a, hemi atan hian Mizoram sawrkar official te an kal a, endik hna thawk tur hian Mamit aṭangin Team 3 SDC kaihhruaina hnuaiah an kal a, Kolasib leh Lunglei aṭangin an kal bawk a, amaherawhchu nimin kha an bazar ni nia sawi a ni a, an inlan loh chhan hi bazar tura an chhuak deuh vek vang nia sawi a ni bawk a, vawiin lamah inlan an awm leh awm loh ngaihchan a ni dawn a ni.

Tarlan tawh angin, relief camp-a awm Bru laklet tura ruahmante hi Mizoramah an vaiin an kir duh ang em tih hriat a la ni lova. Tripura Bru Relief Camp 6-a Mizoram Bru awmte hi a intahtawlin laklet an ni dawn a, tuna ruahmanna ang chuan nimin aṭanga Ningani thleng khian Kaskau camp-a Mizoram Bru awmte enfiah hna thawh tur a ni a, laklet theihte chu June ni 8 leh ni 12 inkarah laklet an ni ang. Bru laklet tura ruahman chhin hi mi 20,710 vel ni tura rin a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram