Rampumah Doctors’ Day hmang

SERCHHIP: Rampumah nimin khan Doctors’ Day hman a ni a, he ni pual hian India Medical Association, Mizoram State Branch te chuan Aizawl Press club-ah thuthar lakhawmtute kawmin he ni pual hian District hrang hrangah a mamawhte hman turin thisen pek runpui neih a nih thu an sawi.
IMA Mizoram State Branch hruaitute chuan mipuite hriselna an ngaih pawimawh em em thu sawiin, chumi piah lama h thawktu medical mite pawh fimkhur tak chung leh zahawm taka hna thawk tura an chah thu an sawi a. Allopathic damdawi te chu registered medical practitioner, MBBS pass chin te chauh lo chuan an chawh thei loh thu sawiin, thiamna nei lo leh zir ve lo te damdawi inchawh tir mai mai lo tura mipuite fimkhur tura an ngen a ni.

IMA hruaitute chuan Doctor te chu mihring ve tho an nih angin an thiamna leh theihnain tlin chin a nei tih mipuiten hriatpui se an duh thu sawiin, doctor te laka harsa tna a awm pawn a hmingchhe zawnga in sawi mai lo a IMA lamah hriattir ni ṭhin se an duh thu an sawi a. Doctor ṭha lo mipuite tana harsatna siam ṭhin an awm chuan an theih anga an chungah action lak ṭhin a nih thu an sawi.

Thutharlakhawmtute zawhna chhangin, IMA President Dr. Lalzamliana chuan an theihtawpin damlo inentirte damdawi chawh kawngah fimkhur tura an inchah ṭhin thu a sawi a, damlo te natna chu anmahni thu lo chuan thuruk anga ngaih a nih thu leh social media-a mimal natna tlangzarh emaw sawichhuah mai chu thil ṭhalo (unethical) a nih thu a sawi a ni.

Doctors’ Day hi kum 1991 aṭangin India ramah hman ṭan a ni a, doctor ropui tak, Dr Bidhan Chandra Roy (BC Roy) pian ni leh thih ni, July 1-ah hman ṭhin a ni. Dr BC Roy hi Jul y 1, 1882-ah a piang a, July 1, 1961-ah a thi a; a hnathawh ṭhat avanga Bharat Ratna pawh lo dawng tawh a ni.

Doctors’ Day pualin JN Hospital Serchhip-a thawk Doctor te chuan nimina OPD-a damlo inentir zinga man chawia investigation tih ngai (Thisen, zun etc test ngai), X-Ray leh Ha phawi man te chu a thlawnin an tih sak a, Doctor te hian Blood Bank-a dah turin thisen an pe bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram