MNF-in thuthar thehdarhtute SEDP chungchang hrilhfiah

MNF party chuan nimin khan Aizawl I&PR Auditorium-ah chanchinthar thehdarhtute hmaah sawrkarna an chelh huna an kalphung tur tlangpui leh Socio Economic Development Programme (SEDP) chungchang an hrilhfiah.

Hemi huna thu sawitu MNF party Programme & Policies Chairman, party Vice President ni bawk Dr. R. Lalthang-liana chuan MNF party-in sawrkar rintlak leh rorelna ṭha ‘Good Governance’ din ngei an tum thu a sawi a. Hmasawnna rualkhai zawka a kal theih nan, sawrkar dan ding lai ngai pawimawhin thuneihna semzai a ni ang a, VC leh Local Council te thuneihna sâng zawk leh hamṭhatna siamsak an tum thu leh NGO-te hman ṭangkai leh an hnathawhna tur sum mamawh te budget-a dahsak an tum thu a sawi.

Dr. R. Lalthangliana chuan SEDP-in a ngaih pawimawh tur te pawh sawiin, ei leh bara intodelh, thil siamna leh siamsa hralhna, mihring theihna tihpun, mipui dawmkan leh khawtlang nun nuam siam te chu ngaih pawimawh an ni ang, a ti a.

SEDP aṭanga ṭanpuina chu hlawhtlinpui tham a ni ngei dawn a. NLUP anga a thlawna pawisa sem a ni ve lo ang, MNF Vice President chuan a ti a, a thlawn veka pawisa dawn zel tumna rilru hi SEDP-ah chuan tihbo emaw siamṭhat emaw tum a ni, a ti bawk.

Heng bakah hian Dr R Lalthanglian chuan Mizo tak leh Hnam rilru puiin Economic-a hmasawnna Economic Nationalism kalpui an tum tih sawiin. SEDP thil tum zingah ram hmasawn tehna bulpui Gross Domestic Product (GSDP) tihsan nana Industrial Development Programme chak taka kalpui a nih tur thu te tarlan a ni.

Nimina MJA te nen inkawm hona hun ah hian zawhna leh chhanna hun neih ani bakah rawtna hrang hrang te sawihona hun hman a ni.