Serchhip-ah Blood Donor Motivator Training buatsaih

Mizoram State AIDS Control Society leh Association for Voluntary Blood Donation (AVBD) Serchhip Branch ṭangkawpin an buatsaih, a thlawna Thisen petute tiphur a, thisen pe uar tura zirtirna hun chu nimin khan CMO Conference Hall Serchhip-ah buatsaih a ni.

“Blood Donor Motivators Training” ah hian Resource Person, Pi Lalhmingliani Pachuau, Quality Manager, MSACS chuan Mizoram chu a thlawna thisen pek uar lamah India rampumah pakuana a nih thu a sawi a, hmasawn zel turin ṭan lak a ngai a ni a ti a. Resource Person dang, Dr Sangzuala Ralte leh Pu Jacob Lalruatpuia te pawhin thisen pek chungchanga mipuite hriat tur pawimawh hrang hrang te an sawi bawk a ni.

April, 2016 aṭanga March, 2017 chhung khan Serchhip Hospital Blood Bank-ah thisen Unit 847 pek niin, heng zinga Unit 590 chu a thlâwna pek a ni a, unit 255 chu inkoh chawpa pek a ni.