MPC Party chuan MLA bial tinin an bial chhung tihhmasawnna tura kum khat atana MLA Fund nuai 100 ṭheuh an neih chu opposition MLA zawng zawng leh Congress MLA ṭhenkhat ten an bial chhung tihhmasawnna atana an hman zawh vek tawh laia, Congress MLA 23-ten an la hmang zo ve lo chuan an bial chhung an ngaihthah zia leh hmasawnna an ngaih pawimawh lohzia a tilang chiang hlea an ngaih thu an sawi.
MPC party chuan thuchhuah an siamah hetianga bial chhunga hmasawnna hnathawh tur tam tak a awm laia an bial chhung siamna tur pawisa an la hrêk thei chuan bial chhung hmasawnna hna thawhna atana hmang lo a, inthlan dawn a vote lei nan an khekah MPC party chuan an ngai tih an sawi a, hetianga bial chhung siamna tur sum a nihna tur ang taka hman tum lo MLA te chu chu in-candidate leh tlak-ah pawh an ngai lo tih an sawi.
Nimin khan MPC party chuan an Sr.Vice President Pu Vanlalhlana kaihhruaina-in Office Bearers Meeting an nei a, kum 2018 MLA General Election lo awm tur thlirhona te an nei a, MPC, ZNP, ZEM-ten thawhhona thuthlung an siam chu ṭha an tih thu leh he thawhhona thuthlungin hmalakna tur a siam leh a ruahman apiangte hlawhtling taka hlenchhuah a nih theih nan MPC party chuan he thawhhona hi rinawm takin a vawng tlat dawn a ni, an ti.