Thenzawl Joint YMA remtihna la hmasa lo chuan engmah tih phal tawh lo

Thenzawl Joint YMA chuan Vantawng Khawhthla behchhana Adventure lam kaihhnawih emaw, zirchianna eng chi pawh neih tumte tan Thenzawl Joint YMA remtihna la hmasa lo chuan engmah tih a remchang tawh dawn lo tih an sawi.

Thenzawl Joint YMA chuan thuchhuah siamin, Mizorama Tuikhawhthla sâng ber, Official Record dinglaia Feet 750 tih chu a dik tawk lo ni awmin Adventure Club pakhat Zotek Adventure Club invuahte chuan July ni 13, 2017 khan Press Conference kovin chanchinbumite hmaah an puangzar a, he thu hian Thenzawl mipuite a barakhaih hle tih an sawi a.

Tuikhawhthla sân zawng teh lama thiamna bik nei pawh ni lo, Adventure Club tam tak zinga pakhatin sawrkar hriatpuina pawh tel lova ‘Vantawng Khawhthla’ sân zawng an hmuh dan mipui hmaa an puanzar chu tu tan mah pawmpui chi a ni lo a, Feet 750-a sâng tih hi Official Record dinglai a la ni reng a ni, an ti a, Thenzawl Joint YMA ngenna pawh zah zo lova Adventure Club pakhatin ‘Vantawng Khawhthla’ chungchanga an hmuh dan leh an hriat dan an puangzar chiam mai chu Thenzawl mipuite ngaih pawimawh lohna lian taka an ngaih thu an sawi.

Vantawng khawhthla hi adventure sports lama tuimi-ten adventure tihna hmunah hmangin tum dangah pawh a khawhthlaa uai thlak (rapelling) te an lo ti tawh ṭhin a, Thenzawl khawtlang chuan inhawng tak leh lawm takin an lo dawng-sawng ṭhin tih an sawi a, Mizo-ramin hmun hmingthang kan neih tlemte zinga State pawn lam mite leh ram pawn lam mite pawhin an ngaihhlutpui ‘Vantawng Khawhthla’ chu Thenzawl Joint YMA in a humhalh tlat lai a ni a, Mizorama tuikhawhthla sang ber a nihna te, a hmingthanna leh ropuina te benghniam tum zawnga hmalakna ang chi hi awm tawh lo se an duh tih an sawi bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram