Arsenal manager Arsene Wenger chuan transfer window hman nuam lem lo tak hman zawh hnuah Alexis Sanchez chuan Arsenal tana a ṭha thei ang bera khel turin harsatna a nei dawn lo tih a sawi.
Chile forward kum 28 mi, Sanchez hian Transfer deadline day khan Manchester City a zawm teuh hle a, hetiang hian Arsenal chhuahsan ṭepin awm mahse Wenger chuan Sanchez chungchangah harsatna a awm lo tih a sawi a ni.
Arsenal hian Thomas Lemar an lakluh theih chuan Sanchez hi £60m-in City hnena hralh hi an remti hman tawh a, mahse Lemar hian Monaco-a châm zui a thlan avangin Sanchez pawh City lamah a kal ta lo a ni.
Wenger chuan, “Rang takin a ṭhat dan berah a awm leh dawn,” tiin a sawi a, “Transfer bazar a tawp tawh a, thil tam tak a a kal liam a. Hemi chungchang hi thil sawi hrehawm tak a ni, a chhan chu tunah hian Monaco-ah Lemar a awm a, amah pawhin chu hmun chiah chu a ngaihtuah a, Sanchez chu hetah a awm a, ani pawhin he hmun chiah hi a ngaihtuah,” tiin a sawi.