Serchhip District Bawrhsap Nazuk Kumar, IAS, Chairman, District Disaster Management Authority, Serchhip ni bawk chuan Covid-19 laka mipuite an him theihna atan Serchhip District chhunga hman tur inkaihhruaina thar (SOP) a tichhuak.
Ni 4.2.2022-a Mizoram sawrkarin Covid-19 hrileng vanga inkhuahkhirhna dân a chhuah ang leh, he thupek part B-in thuneihna a pêk angin District Bawrhsap chuan Covid-19 hrileng hluar zel leh a aia hlauhawm zawka sawi variant of concern ‘omicron’darh zel tur ven nan leh he hri laka mipuite an him nan inkhuahkhirhna siam a nih thu leh thu leh awm hma chuan Serchhip District chhunga hman tur Covid-19 inkaihruaina thupek a chhuah chu hman tur a nih thu a tarlang.
Inkaihhruainaah chuan CAB khauh taka zawm chungin chhunah chauh Biak In-a leng zât chanve (50% seating capacity) aia tam lovin Kohhran Inkhawm pangngai neih phal a ni a, zing leh tlai ṭawngṭai inkhawm pawh phal a ni a, Kohhran Inkhawmpui chhun lamah neih phal a ni a, inkhawm-pui neihna hmun Biak In-a leng zât chanve (50% seating capacity) tel phal a ni a, Covid-19 symptom neite chu inkhawmpui-ah hian tel loh tur a ni a, ruai buatsaih phal loh a ni a, hripui darh huk theihna tur vên nan, a theih chin chinah, hla/ rimawi thun (record) sate play tur a ni a, zai-khawm, zaiho leh zaipawl anga hla sakte khap a ni.
Inneih Inkhawm leh Mitthi Vuinaah inkhawm neihna hmuna leng zat chanve (50% seating capacity) emaw, mi 50 aia tam lo (a tlêm zawk zawk) tel phal a ni a, ei leh in sem phal a ni lo a ni.
Pawl 10 leh 12 board exam turte chu School Education Department thu chhuak angin CAB ṭha taka zawm chungin school leh hostel hawn phal a ni a, hemi atana hman tur SOP School Education Department-insiam angin a kalpui tur a ni a, zirtirtu leh sikula hnathawkte chu Covid-19 vaccine full dose la vek turin School thuneitute chu hma la turin a ti a, pawl 1 aṭanga pawl 9 leh pawl 11 zirlaite tan sikul leh hostel khâr a ni ang a, online-in class lâk chhunzawm a ni ang a, zirna sâng zawk (higher education) kaina rûn (institute) leh College te chu online a kal chhunzawm tur a ni a, Training Institutes-ah chuan a hmuna leng zât chanve (50% seating capacity) luah khatin hawn phal a ni a, Board Exam, hna lak exam adt. chu CAB uluk taka zawm chungin neih phal a ni.
Mipui punkhawmna, anniversary, birthday, adt.-te khap a ni a, amah-erawhchu, sawrkar phalna la-a National/State level programme pawimawhte chu huaihawt phalsak a ni thei ang a, a hmuna leng zât chanve (50% capacity) emaw, mi 50 aia tamlo (a tlêm zawk zawk) emaw ṭum khata punkhawm phal a ni a, zaikhawm, zaiho leh zaipawl anga hla sakte khap a ni a, Picnic spot, Public park, swimming pool, Gym, beauty parlour leh spa-te hawn phal loh niin, lu mehna dawr (hair cutting) chu inkaihhruaina zawm chunga hawn phal a ni a, a huhova pawnchhuah (lui kal, trekking, hiking, adventure sports, adt.), Sports (indoor & outdoor) practice leh inelna, tournament-te neih khap a ni a, walking leh cycling exercise erawh phal a ni a, amaherawhchu, mi panga (5) aia tam chhuahho phal a ni lo.
Restaurant hawn phal niin, a hmuna leng zat chanve (50% seating capacity) chin phal a ni a, tui emaw, tuiril lam chi hrim hrim emaw, in inṭawm tur vên nan a neituten dispo no emaw, no pangngai emaw, tui bottle emaw mitin tan a hran ṭheuh an chhawp ṭhin tur a ni.
Bazar leh dawr-te hawn phal a ni a, sawrkar office-te chu Office hnathawktu zawng zawng kal tur a ni a, phalna/dilna la lâwk lovin office tlawh/dawr phal a ni lo a, Department hotuten office kawt kaiah kutsilna tur leh tihthianghlimna (sanitizer) tur an dah tur a ni a, lirthei tlan danah inkhuah-khirhna a awm lo a ni.