Nimin chawhma khan Raj Bhavan-ah F.Vanlalruata, Chairman leh Lalmalsawma, Member Secretary, Second Mizoram Finance Commission-te chuan Governor Dr. Hari Babu Kambhampati hnenah State Finance Commission report an buatsaih chu an thehlût a, State Finance Commission report hi Governor-in Finance Department hnenah zirchian turin a thawn leh dawn a ni.
State Finance Commission hian State sawrkarin chhiah chi hrang hrang a lak aṭanga tualchhung sawrkar, heng – village councils, municipalities leh autonomous district councils-te’n an chan tur zat bituk te, state sawrkar sum bawm aṭanga tualchhung sawrkarte ṭanpuina grants-in-aid pek dan tur leh tualchhung sawrkarte sum dinhmun siamṭhatna tur chungchangte mumal taka zirchianna an neih hnuah report hi an buatsaih a, he report hian kum 2021-22 aṭanga 2025-26 financial year chhung a huam dawn a ni.
Commission hian kum khat leh thla 10 chhung zirchianna mumal tak a neih hnuah report hi Governor hnenah a thehlut a, he report hi state sawrkarin a lo zirchiana a pawm hnuah a bawhzui dan “action taken report” hi India dânpuiin a phût angin Legislative Assembly-ah la pharh leh tur a ni a, report hi bung 11-a ṭhen niin phek 549 a chhah a ni.
15th Union Finance Commission aṭanga tualchhung sawrkar – village councils leh municipalities-te ṭanpuina sum “local body grants” lo kal ṭhinte hi Legislative Assembly-ah March 31, 2024 hmaa State Finance Commission report bawhzuinate pharh a nih loh chuan dawn zui theih a ni dawn tawh lo a ni.
State Finance Commission report hi pawm a nih hunah chuan tualchhung sawrkarte’n state sawrkar aṭanga kumtina an sum dawn dan tur hriain tualchhung inrelbawlna mumal zawkin an kalpui thei dawn a ni.