Thenzawl Zone Football Association buatsaih Independence Day Football Tournament -2023 chu Loṭhazawl Football Ground-ah MNF Publicity Board Chairman J.Malsawmzuala Vanchhawng chuan khuallian niin a hawng.
Hawnna inkhawm, TZFA Joint Secretary Henry Lalthanpuia kaihhruaiah hian J.Malsawmzuala Van-chhawng chuan thusawiin, infiammite naupang, ṭhalaite leh veteran tana Independence Day Football Tournament buatsaih a ni chu lawmawm a tih thu a sawi a, infiamna chi hrang hrangte chu mihring hriselna atan a pawimawh piah lamah eizawnna tling a ni chho ta zel a, Serchhip District-ah pawh footballer hlawhtling tak tak an awm tawh a, Thenzawl bik pawhin MPL Player-te chherchhuakin hmasawnna tam tak a tawng chho mek a ni a ti a, ṭhalaite tan infiamna lama record neih ṭhat chu hna chi hrang hrang zawnnaah pawh a pawimawh chho zel a, Mizoram sawrkar dinglai pawhin infiammite hamṭhatna turin sawrkar hna laknaah Group B non – gazetted chin hnuai lamah chuan 5% chu infiamna lama tiṭha bikte tan a hauhsak tawh a ni a ti bawk.
TZFA buatsaih Independence Day Football Tournament hi MNYF Thenzawl sponsor a ni a, Thenzawl leh a chhehvel khuaa YMA Branch hrang hrang te, Veteran leh Age Group Under-10, 13 & 16 team 43 zet an tel a ni.