Nimin zing lama thli leh ruah rawn thawk nawn leh avang khan Aizawl Zoological Park-a savawm dahnaah pawn lam atanga thing tlu lût atangin savawm pakhat chu a chhuak ngei nia an hriat thu PC Laltanpuia, Dy. Conservator of Forest, Aizawl Wildlife Division chuan a tarlang.
PC Laltanpuia tarlan danin, savawm chhuak hi chhuizui hna thawh nghal niin, nizan lam thlengin Zoo Area chhung ngeiah a la awm a ni tih finfiah a nih thu a sawi a, College of Veterinary Sciences and Animal Husbandry, Selesih atanga a kah mutna silai (Tranquilizer Gun) leh Zoo trap/thang hmanga chân mek zel a ni tih a tarlang a, savawm awmna hmunin a zir loh avangin a kah mutna hi hmanna hun remchang pawh la awm loin, nizan thlengin sahuana thawktute an la vil reng tih a tarlang a, hetiang harsatna avang hian vawiinah sahuan hi khar rih a ni dawn tih a tarlang.