Cheng nuai 91 chuang eiru-a puh mi 3 thiamloh chantir

Kum 1995 leh 1998 inkara Aizawl SP Office pawisa, cheng nuai 91 chuang ei rutu-a puh mi 3-te chu Court-in thiam loh a chantir.

Special Court-in thiam loh a chantirte hi Sub Inspector (Ministerial) vek, khatih hun laia Aizawl SP Office-a Accountant, Lalsanglawra, Pu Lalruma fapa, College Veng, Cashier, Laldinliana, Pu Tlangchawma fapa, Venghlui leh Bill Assistant, Anne Zosangliani, Pu C. Sawiluaia fanu, Chanmari Vengte an ni a, an pathum hian `91,19,751/- eiruk thubuaiah thiam loh an chang a, Court chuan kum 3 tang tur leh `1,00,000 \heuh chawi turin a ti a, `1,00,000 hi an nei lo a nih chuan thla 3 dang an tan belh ang.

Sawrkar ukil, Pu H. Lalmuankima chuan, Lalsanglawra, Laldinliana leh Anne Zosangliani-te hian kum 1995 May thla atanga 1998 July thla inkar khan Aizawl SP hnuaia Constable 300 atanga 350 inkar vel hlawh an siam thin a, hlawh an siam pah hian thla tin, an chan tur an siam tel ve ziah a, kum 3 chhunga sum an lo insiam ve hi a vaiin Rs. 98,07,751 a ni a, mahse kum 1998 November ni 19 khan Treasury-ah `6,88,000 an dah lut ve thung a, an pathuma sawrkar sum an lo insem hi `91,19,751 niin a sawi.

Sawrkar ukil chuan, an thil tihsual hi hriat chhuah a nih velah khatih laia Aizawl SP, Pu Zorammawia chuan Aizawl Police Station-ah FIR a thehlut a, an pathum hian man an ni a, Prevention of Corruption Act Court chuan thiam loh a chantir ta a, mahse an pathum hian Central Jail-a dah lut nghal lovin Court chuan khin letna hun, thla khat a pe a, hemi chhung hian bail-in an chhuak rih dawn a ni. Court-ah hian Lalsanglawra, Laldinliana leh Anne Zosangliani aiawh hian an ukil te, Pu C. Lalramzauva, Pu Sam Joseph-a leh Pu SN Meitei-te an ding a, sorkar aiawhin Addl. Public Prosecutor, Pu H. Lalmuankima a ding a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram